Avropa Komissiyasının nümayəndələri “Geely”, SAIC və BYD avtomobil zavodlarında yoxlama aparacaq. Məqsəd hakimiyyətin onlara avrozonada istehsal olunanlardan 20% ucuz elektrik avtomobilləri istehsal etməyə kömək edib-etmədiyini yoxlamaqdır. 

Valyuta.az xəbər verir ki, bu barədə "Reuters" üç mənbəyə istinadən yazır.

Onların fikrincə, qitə bazarını qorumaq üçün Çin şirkətlərinə qoruyucu rüsumların mümkün tətbiqi auditin nəticələrindən asılı olacaq.

AK ötən ilin oktyabrından araşdırma aparır və aprelin 11-də Çinə yeni səfərlər planlaşdırılır. Araşdırmanın 13 ay çəkəcəyi gözlənilir. Bununla belə, AK nümayəndələri "Tesla", "Renault" və BMW kimi elektrik avtomobilləri istehsal edən bəzi qeyri-Çin zavodlarına baş çəkməyəcəklər. Çinin proteksionist kimi xarakterizə etdiyi araşdırma Pekin və Avropa İttifaqı arasında gərginliyin artmasına səbəb olub.

AK agentliyə səfərlər barədə xəbəri təsdiqləyib. AK-ın ticarət sözçüsü Olof Gill "Komissiya artıq sorğulara cavab verən Çin və Avropa istehsalçılarından bir nümunə seçib", deyib.

O, dəqiqləşdirib ki, yoxlama səfərləri 2024-cü ilin yanvar-fevral aylarında baş tutacaq.

Paşa Məmmədli