2023-cü ilin yanvar-noyabr aylarında “İpək Yolu Sığorta” şirkətinin topladığı sığorta haqları 16,3 milyon manat təşkil edib.

Valyuta.az-ın hesablamasına görə, bu, ötən ilin eyni dövrü ilə müqayisədə 19% azdır. Başqa sözlə, son bir ildə sığorta şirkətinin yığımları üzrə itkiləri 3,8 milyon manat olub. 2022-ci ilin yanvar-noyabr aylarında “İpək Yolu Sığorta” 20,1 milyon manat sığorta haqqı toplaya bilmişdi.

Sığorta şirkəti Azərbaycana məxsus sərnişin təyyərəsinin zədələnmiş mühərrikinə görə noyabr ayında 431 min manatdan çox sığorta ödənişi verib. Bu isə ümumi ödənişlərin həcmini illik müqayisədə 3,6 dəfə artıraraq 616 min manata çatdırıb. “İpək Yolu Sığorta”nın 2022-ci ilin eyni dövründə ödənişləri 168 min manata bərabər olmuşdu.  

Ödənişlərin kəskin artması sığorta şirkətinin zərərliliyinə nisbətən təsir edib. Belə ki, 2022-ci ilin yanvar-noyabr  aylarında “İpək Yolu Sığorta” topladığı hər 100 manatdan 1 manat ödənişə yönəldibsə, bu ilin eyni dövründə bu rəqəm 3,8 manat təşkil edib.

Xatırladaq ki, "İpək Yolu Sığorta" 1995-ci ildə yaradılıb. Onun nizamnamə kapitalı 14,77 milyon manatdır. Şirkətin səhmlərinin 96,53%-i “ASG Business Aviation” MMC-yə, 3,47 %-i isə "Azərbaycan Hava Yolları" QSC-yə məxsusdur.

Leyli