2023-cü ildə Şimal dənizi "Brent" markalı neftin bir barelinin qiyməti təxminən 10% ucuzlaşıb. 

Valyuta.az "Bloomberg"ə istinadən xəbər verir ki, kotirovkaların qiyməti koronavirus pandemiyasından bəri ən böyük illik enişi göstərib.

Analitiklər neftin qiymətinin belə dinamikasının iki əsas səbəbini qeyd ediblər. Birincisi, qlobal neft tələbinin azalması fonunda OPEC-ə üzv olmayan ölkələrdə yanacaq istehsalının nəzərəçarpacaq dərəcədə artması riskləridir. İkinci səbəb Anqolanın OPEC-dən çıxmasıdır. Afrika ölkəsi qərarını açıqladıqdan sonra neftin qiyməti dərhal aşağı düşüb.

Hazırda "Brent" markalı neftin tədarükü üzrə fyuçers müqavilələri bir barel üçün 77,7 dollar səviyyəsində satılır, baxmayaraq ki, yanvarın əvvəlində və ikinci yarısında kotirovkalar 86-88 dollara çatmışdı.

"Sovcombank"ın baş analitiki Mixail Vasilyev gazeta.ru-ya bildirib ki, yaxın aylarda iri və əhəmiyyətli neft hasil edən ölkələrin heç biri OPEC-i tərk etməyəcək. Ona görə də qısamüddətli perspektivdə "Brent" markalı neftin bir barelinin qiyməti 73-83 dollar/barel diapazonunda qalacaq. Vasilyev 2024-cü ilə dair proqnozlarında "Brent" markalı neftin orta qiymətini 80 dollar/barel səviyyəsində proqnozlaşdırır. Müvafiq olaraq, Anqolanın OPEC-dən çıxmasının Rusiyaya təsiri minimal olacaq, deyə analitik yekunlaşdırıb.

Paşa Məmmədli