Biznes ideyasını necə tapaq? - 3 üsul
Biznes qurmağın ən çətin tərəflərindən biri doğru ideyanı tapmaqdır. Çox vaxt insanlar özlərini biznesdə təsəvvür edə bilir, xarakterini biznesə uyğun hesab edir, amma ağlına ideya gəlmir. Bəzən hansısa biznesi müşahidə edəndə “bu mənim ağlıma necə gəlməyib” deyə düşünürük. Əslində insanlar çox sadə düşünərək müxtəlif bizneslər qura bilirlər. Bəs bunu necə bacarırlar? Biznes ideyası necə tapılır?
BonPara şirkətinin təsisçisi, Kofe.al layihəsinin rəhbəri Orxan Əhməd Valyuta.az-a bu barədə danışdı. O, biznes ideyası tapmaq üçün üç üsula diqqət çəkdi. Orxan bəyin sözlərinə görə, ehtiyacdan yaranan bizneslər daha uğurlu olur:
“Biznes üçün ən effektiv ideya adətən, özünüzün üzləşdiyiniz problemin həlli olan biznesdir. Məsələn, hansısa bir xidmətin mövcud olmadığını görürsünüz, başa düşürsünüz ki, ətrafda da bunu hiss edən insanlar var. Əgər sizin də bu sahədə bilgiləriniz varsa, ehtiyacdan yaranan biznesdirsə, bunun uğur qazanması daha yüksəkdir”.
O.Əhməd ikinci üsul kimi hazırda mövcud olan biznesdəki boşluqlardan yaranan ideyanı misal çəkdi:
“İkinci ola bilər ki, bazarda artıq hansısa həll var, amma siz onun keyfiyyətindən razı deyilsiniz, düşünürsünüz ki, bundan daha yaxşısını etmək olar. Burada keyfiyyət dedikdə həm məhsul, həm xidmət, həm də qiymət ola bilər. Görürsünüz ki, mövcud olan həllər sizin və ətrafdakıların ehtiyacını qarşılamır. Bu yolla ideya formalaşa bilər”.
Orxan bəyin biznes ideyasının yaranması üçün ən effektiv hesab etdiyi üsul isə səyahət etməkdir:
“Səyahət etdikdə xaricdə olan fərqli həlləri görürsən. Bir çox ölkədə tətbiq edilən, bizim ölkədə olmayan həllər və ya xidmətlər var ki, onlarda görüb tətbiq edə bilərsiniz. Bəzən olur ki, hansısa problemi görürsən və onu biznesə çevirmək heç sənin ağlına gəlmir. Xarici ölkədə isə onu görüblər, biznes kimi də həllini ortaya qoyublar. Ona görə də, marağınız olmalıdır ki, kiçik detallara fikir verə biləsiniz. Təkcə görmək kifayət etmir, həm də ətraflı araşdırmaq lazımdır. Mən təcrübəmdən bilirəm ki, Azərbaycanda oturub xarici şirkətlərin saytlarına baxmaqla, veb üzərindən araşdırmaqla biz onların fəaliyyətlərinin heç 0,5 faizini görmürük. Amma səyahət zamanı yerində bu xidmətləri görəndə səndə təəssürat yarana bilər”.
Nuray
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay