İlin sonuna qədər Yaponiya Ukrayna ətrafındakı vəziyyətlə əlaqədar Rusiyaya qarşı sanksiyaları genişləndirəcək və Rusiya Federasiyasına qarşı tədbirlərdən yayınmağa kömək etdiyi iddia edilən üçüncü ölkələrin təşkilatlarını da daxil edəcək. 

Valyuta.az xəbər verir ki, bu barədə çərşənbə günü keçirilən "Yeddilik" Qrupunun (G7) liderlərinin onlayn görüşünün yekunları üzrə Yaponiya Xarici İşlər Nazirliyinin bəyanatında deyilir.

“Rusiyaya qarşı sanksiyalarla bağlı Baş nazir Fumio Kişida bildirib ki, Rusiyanın fiziki və qurumlarına qarşı yeni sanksiyalarla yanaşı, bu tədbirlərdən yayınmada şübhəli bilinən üçüncü ölkə təşkilatları da ilin sonuna kimi hədəfə alınacaq”, - bəyanatda deyilir.

Yaponiya Xarici İşlər Nazirliyi üçüncü ölkələrin təşkilatlarına qarşı sanksiyaların siyahısının tədricən genişləndiriləcəyini qeyd edir. Bundan əlavə, Yaponiyanın gələn ilin yanvarından etibarən G7 səviyyəsindəki razılaşmalara uyğun olaraq Rusiya almazlarının idxalını məhdudlaşdırmaq üçün də tədbirlər görəcəyi vurğulanır.

Yeddilik Qrupu (G7) çərşənbə günü keçirilən iclasının sonunda elan edib ki, 2024-cü il yanvarın 1-dən Rusiyada hasil edilən və ya emal edilən almazların idxalına məhdudiyyətlər tətbiq edəcəklər və martın 1-dən etibarən digər ölkələrdə emal edilmiş rus almazlarına məhdudiyyətlər də qüvvəyə minməlidir.

Ukraynadakı vəziyyətə görə bir neçə mərhələdə tətbiq edilən Yaponiya sanksiyaları artıq Rusiyadan olan 1000-ə yaxın insan və 100-ə yaxın təşkilatı əhatə edir. “Alfa Bank”, VTB, VEB.RF, “Novikombank”, “Otkritie Bank”, “Promsvyazbank”, “Rossiya Bank”, “Sberbank”, “Sovcombank”, həmçinin 40-a yaxın digər təşkilat və şirkətlərin aktivləri dondurulub. Bundan əlavə, Yaponiya artıq 800-ə yaxın adda olan Rusiya Federasiyasına ixracı qadağan edilən mal və texnologiyaların siyahısını təsdiqləyib. O cümlədən, dəyəri 6 milyon yendən (təxminən 43 min dollar) çox olan avtomobillərin ixracı qadağan edilib. Avqustun 9-dan Yaponiyadan Rusiyaya mühərrik həcmi 1,9 litrdən çox olan benzin və dizellə işləyən avtomobillərin və hibrid avtomobillərin tədarükü də qadağan edilib. 

Nicat