İdarəçilər niyə sürətli qərar verməlidirlər? - Anar Bayramov şərh edir
İdarəçilərdən gözlənilən bacarıqlardan biri də cəld qərar vermədir. Bəziləri düşünür ki, tələsən təndirə düşər. Cəld yanlış qərarı verməkdənsə, gec doğru qərarı vermək yaxşıdır. Bəziləri isə əksinə, gec qərar vermənin şirkəti geri salacağını düşünürlər. Bəs necə olmalıdır? Biznesdə idarəçilərin tez qərar vermə bacarığına malik olmaları mütləqdir?
“SAT Group” şirkətinin həmtəsisçisi, idarəçi və biznes konsultant Anar Bayramov Valyuta.az-a bu barədə danışdı. Onun sözlərinə görə, idarəçilərdə bu bacarığın olmağı mütləqdir:
“İdarəçilər sürətli qərar verməlidirlər. Xüsusilə, bugünkü biznes mühitində sürətli qərar vermək böyük rəqabət üstünlüyü yaradır. Gec qərarvermə şirkəti rəqabətdə geri salır. Çünki sən qərar verənə qədər rəqib artıq qərar verir, hərəkətə keçir, sən gecikirsən. Ümumiyyətlə, sürət tək qərarvermədə yox, biznesin bütün proseslərində çox vacibdir”.
Anar Bayramov deyir ki, gec qərar verilirsə, deməli düz getməyən nəsə var. Onu tapıb həll etmək lazımdır:
“Baxmaq lazımdır ki, qərar niyə gec verilir, harda problem var və s. Səbəbi tapıb aradan qaldırmaq lazımdır. Mən demirəm ki, necə gəldi qərar verək. Təbii ki qərarları ölçüb-biçib qərar vermək önəmlidir. Risklərə, imkanlara baxmaq lazımdır, amma gec qalmaq da olmaz”.
A.Bayramov bildirir ki, müasir texnologiya dövründə cəld qərar vermək daha asandır:
“Bunun üçün müasir texnologiya, alətlər, avtomatlaşma şirkətlərin köməyinə gəlir. Biznes proseslərin avtomatlaşdırılması, data menecment prosesinin, hesabatlığın avtomatlaşdırılması ilə şirkətlər qısa müddətdə təhlil edə bilirlər ki, düzgün qərarlar verə bilsinlər”.
Nuray
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay