Azərbaycanın qida emalı avadanlığı, qablaşdırma qurğuları köhnəlib. Belə bir problemin mövcudluğu inkişafa mane olur. Yaranan bu vəziyyət ABŞ-ın avadanlıq istehsalçılarına ölkədəki qida emalının modernləşdirilməsini dəstəkləmək imkanı yaradır.

Valyuta.az-ın xəbərinə görə, bu barədə Beynəlxalq Ticarət Administrasiyasının məlumatında bildirilib.

Qeyd olunub ki, Azərbaycanın azad olunan əraziləri həm yerli, həm də beynəlxalq şirkətlər üçün kənd təsərrüfatında yeni imkanlar yaradıb.

“İşğaldan azad olunan ərazilərdə kənd təsərrüfatı potensialını müəyyən etmək üçün texniki-iqtisadi əsaslandırmalara ehtiyac var”, - deyə bildirilib.

Bundan başqa, qeyd olunub ki, Azərbaycan öz iqtisadiyyatını şaxələndirmək üçün kənd təsərrüfatını dörd prioritet sektordan biri kimi müəyyənləşdirib, əhalinin 37%-i məhz bu sahədə çalışır: “Lakin kənd təsərrüfatı ÜDM-in yalnız 7%-ni təşkil edir. Azərbaycan məhsulları postsovet bazarlarında güclü brend kimi tanınır və çox vaxt yüksək qiymətə satılır”.

© APA