Biznes adamı olmaq istəyən tələbələrə 5 tövsiyə
Tələbəlik dövrü bir gəncin həyatında önəmli mərhələdir. Çünki artıq yetkinlik yaşına çatdığınıza görə, gələcək planları qurmağa, özünüzü tapmağa başlayırsınız. Bu səbəbdən, universiteti bitirdikdən sonra nə edəcəyi hər kəsi düşündürür. Tələbələr də biznes sahibi olmaq istəyirlər, amma biznesə necə başlamalı olduqlarını bilmirlər.
Biznes kouç Nəcəf Allahverdiyev Valyuta.az-a dedi ki, bunun üçün düşünmək yox, elə tələbəlik dövründən hərəkətə keçmək lazımdır. N.Allahverdiyev biznes adamı olmaq istəyən tələbələrə 5 tövsiyə verdi.
Proaktiv olun
Siz hərəkətə keçməlisiniz, gözləməli deyilsiniz ki, kimsə sizə nəsə təklif edəcək. Ən əsas da universiteti bitirməyi gözləməməlisiniz. İndidən aktiv olmalı, həyatınızın sükanını öz əlinizə almalısınız. Fikirləşməli deyilsiniz ki, hələ mən tələbəyəm.
Təklifləri dəyərləndirin
Bu mərhələdə təbii ki sizə iş təklif olunmayacaq. Hansısa biznes də başlamaq birdən-birə çətin olduğundan könüllülük fəaliyyəti ilə məşğul olmağı tövsiyə edirəm. Hansısa təşkilatda 6 ay, 1 il könüllülük fəaliyyəti ilə məşğul olun, orada olan prosesləri, insanlarla olan ünsiyyəti, iş mühitini, kollektivlə işləməyi və bu kimi vərdişləri öyrənin. Universitet illərində 2-3 belə könüllülük fəaliyyəti sizin xeyrinizədir.
Təcrübəçi olun
Artıq 2-3 təşkilatda könüllü kimi çalışdıqdan sonra təcrübəçi kimi iş yeri axtarın. Yenə sizə heç kim zəng vurub, dəvət etməyəcək. Könüllü çalışdığınız müəssisələrdən başlayaraq digər müəssisələrə də müraciət edə bilərsiniz. Ola bilər ki, ilkin mərhələdə bu işi ödənişsiz edəsiniz, amma proseslərin dərinliyinə varacaqsınız.
Öncəliyiniz pul qazanmaq yox, inkişaf etmək olsun
Təcrübəçi kimi fəaliyyət göstərə biləcəyiniz yerdə əsas meyarınız ödəniş, maaş olmamalıdır. Sizə təcrübəçi kimi fəaliyyətinizə görə məvacib təklif edə bilərlər, amma siz bu məbləğdən daha çox o işin gələcək perspektivinə baxmalısınız. Ola bilər ki, öncə ödənişsiz işləyəsiniz, amma işləri doğru edib, bacarığınızı nümayiş etsəniz, müqabilində tam işçi kimi işləyə bilərsiniz və burada daha çox qazancınız ola bilər. İlkin mərhələdə pul barədə düşünüb, ona tərəf qaçmayın. Bir çox təlimlər keçirilir. Bu təlimlərin çoxu ödənişsizdir. Çalışın ki, bu təlimlərdə iştirak edin. Ən pis ad çıxartmış təlimdə də, ən yaxşı ad çıxarmış təlimdə də iştirak edin. Bilin ki, istənilən halda bu təlimlərdə iştirak sizi inkişaf etdirəcək.
Xarici dil öyrənin
Bu dövrdə xarici dil bacarıqlarınızı artırın. Həm rus, həm ingilis dilini ən azından danışıq səviyyəsində öyrənin. Bir ilə, il yarıma istənilən dili mənimsəmək olar. Bizneslə məşğul olmağı arzulayırsınızsa, bu dil bilikləri sizin üçün faydalı olacaq.
Nəcəf Allahverdiyev deyir ki, çəkdiyiniz əziyyətlər mütləq sizə geri dönüş edəcək:
“Tövsiyə edərdim ki, tələbəlik illərini əsgərlik kimi dəyərləndirəsiniz. Bu dövrdə çəkdiyiniz əziyyətlər, bütün zəhmətləriniz bir müddətdən sonra sizin rahat yaşamınızı təmin edəcək. Bu çətinlikləri həyatınıza investisiya kimi qiymətləndirin”.
Nuray
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay