Mənzil İnşaat Dövlət Agentliyinin (MİDA) tabeliyində fəaliyyət göstərən “MİDA” MMC-nin tenderi ləğv edilib. 

Valyuta.az xəbər verir ki, bir ədəd pikap tipli, dizel mühərrikli nəqliyyat vasitəsinin satın alınması ilə bağlı keçirilən tenderdə “Dövlət satınalmaları haqqında” Qanunun tələbləri pozulub. 

Tenderin ləğv olunmasında Qanunun istinad edilən maddələrindən biri də 38.2-ci maddədir. Həmin maddədə qeyd edilir ki, tender komissiyası bu Qanunla müəyyənləşdirilmiş vəzifələrini yerinə yetirərkən qeyri-obyektivliyə yol verərək, hər hansı iddiaçının tərəfini saxlayarsa, iddiaçılardan hər biri müvafiq icra hakimiyyəti orqanına və ya məhkəməyə müraciət edə bilər. Həmin orqanlar tenderin hazırlanması və keçirilməsi zamanı qanun pozuntusuna yol verildiyini təsdiqləyərsə, tenderin nəticələri ləğv olunur və satınalan təşkilat həmin iş üzrə yeni tender keçirir. Bu halda qəbul olunmuş qərardan fərqlənən xüsusi rəy vermiş komissiya üzvlərindən başqa, komissiyanın sədri və digər üzvləri 3 il müddətində hər hansı tender komissiyasının sədri və ya üzvü ola bilməzlər.

Belə aydın olur ki, tender komissiyası qanunsuzluğa yol verib. Bu barədə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə məlumat verilib. Dövlət xidməti isə tenderin ləğv olunması ilə bağlı “MİDA”ya məktub göndərib. Bu məktub əsasında tender ləğv edilib. 

“MİDA” MMC-nin rəhbəri Fərhad Təhməzovdur. O, Azərbaycan Qida Təhlükəsizliyi Agentliyinin sədri Qoşqar Təhməzlinin qardaşıdır. 

Hüseyn