Sosial şəbəkələrdə tez-tez qarşımıza satış mütəxəssisi olmaq üçün kurslar, təlimlər çıxır. Bu istiqamətdə iş elanları da kifayət qədərdir. Ətrafımızda satış mütəxəssisi olmaq istəyənlər də çoxdur. Yəni satış mütəxəssisi olmaq istəyənlər də çoxalır, bazarda tələb də var. Amma nədənsə, bu sahəyə yönələnlərin heç də hamısı davam edə bilmirlər. 

Biznes konsultant Azad Qəhrəmanov Valyuta.az-a açıqlamasında dedi ki, satış mütəxəssisi olmaq istəyənlərin sayı çoxalsa da, hələ də satış mütəxəssislərinin sayı azdır: “Peşəkar satış mütəxəssislərinə tələb həddindən artıq çoxdur. Hər bir şirkətin satış mütəxəssisinə ehtiyacı var. Elə şirkətlər var ki, işin 90 faizi satış mütəxəssislərindən asılıdır. Məsələn, pərakəndə mağazalar şəbəkəsi, dağıtım şirkətləri, banklarda çalışan əməkdaşların böyük bir qismi, əməliyyat şöbəsinin əməkdaşları, kredit müəxəssisləri və s. bunlar hamısı əslində satış edən mütəxəssislərdir. Adları satışla bağlı olmasa da, gördükləri iş həm də satışdır. Bazarda vəzifəsinin adı satış mütəxəssisi olanlar var. Ümumi götürəndə, bəli, bu sahəyə tələb böyükdür”.

Azad Qəhrəmanov deyir ki, satış mütəxəssisi olmaq istəyənlərin sayı çox olsa da, bazarda hələ də bu mütəxəssislərə tələbatın böyük olmasının səbəbi var: “Peşəkar satış mütəxəssisi olmaq istəyənlər hələ də azdır. Çünki satışa çox adam müvəqqəti bir iş kimi baxır. Buna görə də, bu peşəyə tam sahiblənmirlər. Tam sahiblənmədikdə isə burada istədikləri qədər pul qazana bilmirlər və nəticədə işi buraxırlar”.

“Satış gəlirli sahədir” deyirlər. A.Qəhrəmanov satış mütəxəssislərinin həm çox, həm də az pul qazana biləcəklərini bildirdi: “Məşhur deyim var ki, dünyada ən çox qazananlar da, ən az qazananlar da satış mütəxəssisləridir. Yəni satış elə bir işdir ki, orada ancaq sabit maaş da almaq olar, elə satış əməkdaşları da var ki, gəlirinin 80-90 faizini dövriyyələrindən gələn bonuslar təşkil edir. Sabit əməkhaqqı artıq onun gəlirinin çox kiçik hissəsi olur. Yəni bonuslardan böyük pullar qazana bilirlər. Amma bunun üçün satışa ciddi yanaşmaq lazımdır”. 
Bəs hər kəs satış mütəxəssisi ola bilərmi, yoxsa bu işi görmək üçün insanda özəl xüsusiyyətlər olmalıdır ? A.Qəhrəmanov bildirir ki, üzərinizdə işləsəniz, satış mütəxəssisi ola bilərsiniz, amma bəzi xüsusiyyətləriniz olmasa, bu, çətindir: “Anadangəlmə bəzi xüsusiyyətlər adama kömək edir. Adam 20 yaşına gələnə qədər onda ünsiyyət bacarıqları varsa, insanlarla pozitiv münasibət qura bilibsə, insanlardan qorxmursa, əksinə insanlarla ünsiyyətdən zövq alırsa, o adamların üstünlüyü olur“. 

Həmsöhbətimiz deyir ki, satış mütəxəssisliyi idmançı xarakteri tələb edir: “Yəni mübariz olmaq, axıra qədər getmək, yarış içində ola bilmək kimi xüsusiyyətləri tələb edir. Ona görə də, idmançı ruhu olan və insanlarla ünsiyyətdən zövq alan şəxslər üçün satışda uğurlu olmaq daha rahat olur. Amma heç kimin də burada qarşısında baryer yoxdur, hər kəs əgər istəyi güclüdürsə, yavaş-yavaş satış peşəsinə yiyələnib, uğurlu ola bilər”.

Nuray