“Bu gün mağazasdan hədiyyə alırdım. Hədiyyəni hazır edənə qədər ətrafdakı məhsullara baxırdım. Şüşə çaynikə baxanda, ehtiyatsızlıqdan qapağı düşüb sındı. Təbii ki mənə çaynikin pulunu ödətdilər. Etiraz etmədən, sakitcə ödənişi edib çıxdım, amma maraqlıdır, alıcı təsadüfən qırılan məhsulun pulun ödəməlidir?”

Sosial mediada belə bir paylaşım qarşıma çıxdı. Bu tipli problemlə üzləşən müştərilər çoxdur. Bəzən mağazada onlardan məhsulun 50 faiz dəyərini ödəməyi tələb edirlər, bəzən isə tam ödənişi etmələrini. Əslində, hüquqi prosesdur necə olmalıdır? Alıcı o zərərin dəyərini ödəməlidirmi?

Vəkil Rəşad Əliyev Valyuta.az-a açıqlamasında alıcıların marketə vurduğu zərəri ödəməli olduqlarını dedi: 

“Bu mülki pozuntulara daxildir. Mağazaya ziyan vuran şəxs mülki hüquqi məsuliyyət daşıyır. Əgər hər hansı formada bilərəkdən, ya bilməyərəkdən ziyan vursa belə, həmin zərərin əvəzini ödəməyə borcludur”.

Bəs zərərin nə qədərini ödəməlidir? Vəkil bunun sahibkarın qərarına bağlı olduğunu deyir: “Əgər sahibkar ödənişin tam edilməsini istəyirsə, o zaman müştəri tam məbləği ödəməlidir. Bəzən müəyyən qədər aşağı məbləğlər də istəyə bilirlər. Yəni bu, sahibkarlara görə dəyişir”.
Azad İstehlakçılar Birliyinin sədri Eyyub Hüseynov alıcıların da öz hüquqlarını bilməli olduqlarını dedi: “Əgər satıcı malı poletilen torbaya qoyub istehlakçıya verirsə və istehlakçı dükandan çıxmamış o torba cırılırsa, mala ziyan dəyirsə burada istehlakçı yox, artıq satıcı cavabdehdir. Belə hallarda mübahisə yarandıqda, istehlakçılar 195 qaynar xətti ilə İqtisadiyyat Nazirliyinə məlumat verməli və hüquqlarını qorumalıdırlar”.

Nuray