“Bütün Avropa ölkələrininn ən bahalı marketlərinə getsək, görərik ki, orda endirimli mallar var”. 

Bunu Valyuta.az-a qida məsələləri üzrə ekspert Ağa Salamov bəzi marketlərin endirimə qoyduğu məhsulların keyfiyyəti haqqında danışarkən deyib. 

Ekspert deyib ki, bizim marketlərdə təkcə endirim olursa, xaricdə bəzən həmin məhsulu digərinin üzərinə hədiyyə qoyurlar:

“Məsələn, görürlər ki, banan bir balaca qaralıb, onun üzərinə hədiyyə yazırlar ki, kim istəsə götürsün. Bu da marketinq baxımından biznes xarakterlidir. İnsanlar çox vaxt bilir ki, həmin marketdə endirimli, hədiyyəli məhsul var. Ona görə də belə mağazaların müştərisi çoxalır. Azərbaycanda bəzən marketinqdən xəbərdar olan sahibkarlar son istifadə müddətinin bitməsinə hələ xeyli vaxt, məsələn, 2 ay qalan məhsulları endirimə qoyurlar".

Ağa Salamov bildirib ki, çox vaxt endirimə qoyulan məhsullar istifadə müddətinin bitməsinə az qalmış məhsullar olur:

“Vaxtının bitməsinə az qalmış o demək deyil ki, bu məhsulu qoyulan tarixdə yesəniz, sizə nəsə olacaq. Xeyr, elə deyil. Doğrudur, bəzi riskli məhsullar var ki, məsələn, balıq, toyuq, ət - bunlardan hazırlanan digər qidalar vaxtı keçəndə yeyilərsə, zəhərlənmə baş verə bilir. Quru məhsullar, məsələn, atışdırmalıq qidaları, konservləri müddəti keçən gün də yesək, zəhərlənmə verməz. Bundan qorxmaq lazım deyil. Əsas diqqət etmək lazımdır ki, məhsulun vaxtı keçməsin. Belə məhsullar satışdan yığışdırlmalı və məhv edilməlidir”.

Davud