Azərbaycanda zeytun istehsalı üçün əlverişli şərait olsa da, nədənsə hələ də ölkəmiz bu sahə üzrə də idxaldan asılı olaraq qalır. Halbuki əhalinin bu sahəni inkişaf etdirməyə marağı böyükdür. 

Kənd təsərrüfatı mütəxəssisi Vahid Məhərrəmov Valyuta.az-a açıqlamasında bildirib ki, zeytun istehsalı ilə bağlı yaranmış vəziyyəti həmin sahəyə ciddi fikir verilməməsilə əlaqələndirib:

“Azərbaycan zeytun istehsalı üçün əlverişli şərait olsa da, ölkəmizdə məhsuldarlıq aşağı olduğundan və sözügedən sahəyə ciddi fikir verilməməsi səbəbindən hələ də zeytun məhsullarını idxal edirik. Məhsuldarlığın aşağı olması səbəbindən də həmin məhsuldan kifayət qədər yararlana bilmirik. Həmin sahə ilə ciddi məşğul olunsa, Azərbaycan özünün zeytuna olan tələbatını tam şəkildə ödəyə bilər. Nəticənin əldə edilməsi üçün isə yerli torpaq-iqlim şəraitinə uyğun yeni məhsuldar sortlarla işləməliyik. Aqrotexniki qaydalara əməl olunmaması da bu sahənin də idxaldan asılılığına səbəb olur. Zeytun yağları kifayət qədər bahalı yağlardır. Ona görə də onu istehsal edib, gəlirlərimizi artıra və istehsalı dayanıqlı edə bilərik. İndilikdə isə zeytun yağı əsasən Türkiyə, İspaniya və İtaliyadan gətirilir”.

Ramiz