Əfqanıstan əfqanisi 2023-cü ilin üçüncü rübündə dünya valyutaları arasında artıma görə lider olub. Bu müddət ərzində Əfqanıstan valyutası 2021-ci ildə Taliban hakimiyyətə qayıtdıqdan sonra itkiləri kompensasiya edərək, 9% güclənib.

Valyuta.az xəbər verir ki, bu barədə "Bloomberg" məlumat yayıb.

Əfqaninin güclənməsinə milyardlarla dollar humanitar yardım və qonşuları ilə artan ticarət kömək edib. Bundan əlavə, Taliban milli valyutanın möhkəmlənməsi üçün bir sıra tədbirlər həyata keçirib, o cümlədən dollar və Pakistan rupisindən istifadəni qadağan edib.

Lakin ekspertlərin fikrincə, əfqaninin güclənməsi ölkədə davam edən siyasi qeyri-sabitlik fonunda müvəqqəti haldır. Əhalinin əksəriyyəti yoxsulluq həddində yaşayır, iqtisadiyyat sanksiyalara görə tənəzzülə uğrayır.

BMT yardımının 2022-ci ildə təxminən 4 milyard dollar, bu il isə 1,1 milyard dollar olacağı təxmin edilir. Bu vəsaitlər Əfqanıstan əhalisinin yarısının sağ qalmasına kömək edir. Həmçinin, pul köçürmələri qeyri-rəsmi kanallar vasitəsilə ölkəyə aktiv şəkildə daxil olur.

Ölkə hakimiyyəti Əfqanıstanın zəngin təbii ehtiyatlarına, o cümlədən litiumuna investisiya cəlb etməyə çalışır. Bununla belə, kütləvi insan haqları pozuntuları fonunda iqtisadi perspektivlər zəif olaraq qalır.

Paşa Məmmədli