Türkiyə prezidenti Rəcəb Tayyib Ərdoğan yaxın günlərdə rusiyalı həmkarı Vladimir Putinlə telefon danışığı aparmaq niyyətindədir və o, taxıl müqaviləsini müzakirə etməyi planlaşdırır. 

Valyuta.az xəbər verir ki, bu barədə Türkiyə liderinin administrasiyasındakı mənbə bildirib.

Bir gün əvvəl Ərdoğan rusiyalı həmkarı ilə taxıl müqaviləsinin bərpası məsələsini müzakirə etməyə hazırlaşdığını bildirib. O, ərzaq dəhlizinin yenidən açılması imkanının hələ də qalacağına ümid etdiyini deyib.

“Biz danışıqların yaxın günlərdə baş tutacağını gözləyirik”, - deyə mənbə iki ölkə liderləri arasında danışıqların nə vaxt baş tuta biləcəyi ilə bağlı suala cavab verib.

Bundan əlavə, onun sözlərinə görə, tərəflər “Rusiyanın təklif etdiyi qaz qovşağı layihəsini və Qətərlə Rusiya taxılının emalı və ehtiyacı olan Afrika ölkələrinə çatdırılması üçün birgə layihəni” müzakirə edə bilərlər.

2022-ci il iyulun 22 -də İstanbulda Rusiya, Türkiyə, Ukrayna və BMT arasında Qara dəniz vasitəsilə Ukraynadan kənd təsərrüfatı məhsullarının ixracı üçün dəhliz yaradılması haqqında saziş imzalanıb. 16 iyul 2023-cü ildə Rusiyanın BMT-dəki missiyası taxıl sazişindən çıxdığını elan edib.

İyulun 17-də sövdələşmənin icrası zamanı Rusiya Federasiyasının 1 milyard ABŞ dolları məbləğində itki ilə üzləşdiyi barədə xəbərlər yayılıb. Həmin gün Ukrayna Xarici İşlər Nazirliyinin rəhbəri Kuleba bəyan edib ki, taxıl müqaviləsinin ləğvi quru yollarla kompensasiya edilə bilməz.

Nicat