Mühəndislər əlverişsiz hava şəraitində belə elektrik enerjisi istehsalını davam etdirmək məqsədilə günəş panellərini avtomatik olaraq qardan təmizləməyin yolunu tapıblar.

Valyuta.az xəbər verir ki, ABŞ-ın Toledo Universitetinin komandası toplanmış qarın günəş panellərinin səmərəliliyinə təsir etmədən sürüşməsinə imkan verən zolaq örtük hazırlayıb. Günəş panelləri buludlu günlərdə elektrik enerjisi istehsal edə bilər, lakin qar örtüyü günəşdən gələn işığı elektrikə çevirmək qabiliyyətinə tamamilə mane ola bilər. Bu vəziyyət güclü qar yağan bölgələrdə elektrik enerjisi istehsalının ildə 12 faizinin itkisinə səbəb ola bilər. Özünü təmizləyən bu zolaqlar həm yeni, həm də mövcud günəş panellərinə nisbətən asanlıqla tətbiq oluna bilər.

Toledo Universitetinin Mexanika Sənayesi və İstehsalat Mühəndisliyi Departamentinin dosenti Hossein Sojoudi açıqlamasında, "Bu zolaq örtükləri panelin alt kənarına tətbiq olunur və işləmək üçün heç bir enerji tələb etmədən passiv vəziyyətdə qarın təmizlənməsinə imkan verir. Bizim zolaq örtüyümüz heç vaxt günəş işığının udulmasına və ya panelin səmərəliliyinə mane, yaxud hər hansı qismən kölgə və ya isti ləkələrə səbəb olmur. O, həmçinin modulun zəmanətini ləğv etmir, əslində ömrünü uzadır. Bizim həllimiz, güclü qar yağan ştatlarda hər il 150 milyon dollar əlavə gəlir əldə edə biləcək, oyunu dəyişdirən texnologiyadır. Strateji tərəfdaşlarımızın köməyi ilə biz il boyu günəş enerjisi ilə bağlı verdiyimiz sözə əməl edirik" - sözlərini deyib.

ABŞ və Yaponiyada aparılan sınaqlardan sonra bu zolaqla təchiz edilmiş günəş panellərinin illik enerji istehsalında beş faizdən çox yaxşılaşma təmin edildiyi müəyyənləşib. ABŞ-nin Enerji İnformasiya Administrasiyasının rəqəmlərinə görə, keçən il ölkədə elektrik enerjisi istehsalının təxminən 3,4 faizi günəş panellərinin payına düşüb. 2023-cü ildə ABŞ-də yeni elektrik enerjisi istehsal gücünün yarısından çoxunun günəş enerjisi hesabına təmin ediləcəyi təxmin olunur. 

Sənaye tərəfdaşları ilə işləyən Dr. Sojudi, 2023-cü ilin sonuna qədər ABŞ-də minlərlə zolaq örtüklərinin quraşdırılacağını gözlədiyini 2024-cü ilin sonuna qədər isə bir milyon örtük istehsal ediləcəyini gözlədiyini bildirib. 

Elmir