Türkiyənin ən böyük təkər şirkətlərindən biri olan 96 illik “Tatko”da pay savaşı gedir.

Ortaqlardan Şen Yalman (86) oğlu Ziya Gür Yalman və qardaşı oğlu Kərim Oktay Yalman da daxil olmaqla 5 nəfərə qarşı onu aldatdıqları iddiası ilə cinayət işi qaldırıb.

Publika.az Türkiyə mətbuatına istinadən xəbər verir ki, İstanbul Baş Prokurorluğuna təqdim edilən cinayət işi üzrə şikayət ərizəsinə əsasən, Türkiyənin ən sürətlə böyüyən 100 şirkəti arasında yer alan Tatko Lastik Sanayi Ticaret AŞ 96 il əvvəl Mehmet Rıfat Yalman tərəfindən təsis edilib. Yalmanın ölümündən sonra şirkət onun iki oğluna qalıb. Müraciətdə yer alan iddiaya görə, Mehmet Rıfat Yalmanın nəvəsi Kerim Oktay Yalman “Tatko Companies”in baş direktoru Vedat Özçeliklə birlikdə hərəkət edərək əmisi Şen Yalmanın 100 milyon dollarlıq (təxminən 2,6 milyard TL) şirkət səhmlərini dələduzluq yolu ilə ələ keçirib.

Digər şübhəlilərlə birlikdə hərəkət edən Kerim Oktay Yalman əmisinə şirkətlərin hər an müflis ola biləcəyini və bütün var-dövlətini itirə biləcəyini deyib. İflasdan qorxan Şen Yalman depressiyaya düşüb və not yazaraq intihara cəhd edib. Şen Yalman xüsusi xəstəxanada müalicə olunub. Bir müddət sonra Şen Yalman qardaşı oğlu və şirkətə qarşı İstanbul Asliye Ticarət Məhkəməsində ilkin iddia qaldırıb. Şen Yalmanın vəkili vəsatətində baş verənləri belə izah edib:

“Şen Yalmanın müalicəsi davam edərkən onun payları əlindən alınıb. Kərim Oktay Yalman digər şübhəlilərlə hərəkət edərək, ən zəif halında ondan istifadə edib, təzyiqlərini artırıb və beləliklə də saxtakarlıq və dələduzluq cinayəti törədib. Şirkətin baş direktoru Vedat Özçelik Kerim Oktay Yalman və şirkət işçiləri Mert Tarlan, Serhat Kutlan və Aycan Avcı şirkətin qiymətləndirməsi ilə bağlı yalan və yanıldıcı məlumatlar verərək müştərimi şirkətin səhmlərini su qiymətinə satmağa razı salıblar. Müştərinin oğlu Ziya Gür Yalman da öz mənfəəti üçün atasının bu şəkildə aldadılmasına göz yumub. Müştərinin digər oğlu Ahmet Yalman isə şübhəlilər tərəfindən şirkətə işə götürülməyib. Şəxsin iradəsini asanlıqla qıran şübhəlilər onu tək qoyub, paylarını əlindən alıblar. Haqsızlığa dözməyən və şirkətdən kənarlaşdırılan müştərinin oğlu Ahmet Yalman bu vəziyyətə görə xəstələnib və Barselonaya köçüb”.

"Şübhəlilərin həbs olunmasını, şirkət və bank sənədlərinə əl qoyulmasını istəyirik" deyən Şen Yalman da İstanbul Asliye Ticarət Məhkəməsində iddia qaldırıb.