Şagirdlərin məktəbə telefon aparması qadağan oluna bilərmi? - Ekspert
“Orta məktəblərdə mobil telefonlar qadağan oluna bilər, amma bu addımı atmamışdan öncə, məktəblərdə kommunikasiya vasitəsi kimi alternativ əlaqə və ünsiyyət vasitələri tətbiq olunmalıdır”.
Bunu Valyuta.az-a açıqlamasında təhsil eksperti Kamran Əsədov şagirdlərin məktəblərə mobil telefon gətirməsi məsələsinə toxunarkən deyib.
Ekspert bildirib ki, yəni əlavə resurslar tapmadan telefondan istifadəyə qadağa qoya bilmərik:
"Alternativlər olmayanda qadağa effekt verməyəcək, əksinə daha mənfi nəticələrə səbəb olacaq. Hər bir məktəbin siniflərində kameralar olmalıdır ki, valideynlər onlar vasitəsilə uşaqları barədə xəbərdar olsun. Yaxud da tədris işləri üzrə müavin istisna olmaqla, digər müavinlər valideynlərə uşaqları barədə ünsiyyət qurmaq imkanı yaratmalıdırlar. Məktəblərdə telefonu qadağan etmək üçün birinci növbədə onun problem olduğunu görməliyik. Məktəbdəki neqativ hallar şagirdlər tərəfindən çəkilib paylaşılırsa, bu tədrisin təşkilindəki problemin göstəricisidir. Şagirdlər telefondan istifadə etməklə dərsin gedişini bilərəkdən pozursa, bu qadağan oluna bilər. Uşaqların mövzu ilə bağlı əlavə araşdırma aparması zamanı isə telefon qadağan olunmamalıdır. Ona görə də telefondan necə, harda, nə vaxt və nə qədər istifadə etməklə bağlı həmin resurslardan istifadə üçün icazə müəyyənləşməlidir. Şagirdlər telefondan əsasən ünsiyyət vasitəsi kimi istifadə edir. Tədqiqat predmeti kimi ondan istifadə səviyyəsi isə aşağıdır”.
Ekspert deyir ki, qaydalar tətbiq olunmayana qədər məktəblərdə telefondan istifadə qadağan oluna bilməz:
“Amma hər bir məktəb öz daxili nizam qaydalarına əsasən bu qadağanı qoya bilər. Fransa məktəblərində həm şagirdlər, həm də müəllimlərə dərs zamanı telefondan istifadə qadağandır. Onlar məktəbə gələndə telefonu qoruyucu yerə qoyur, çıxanda da götürürlər”.
Qeyd edək ki, təhsil naziri Emin Əmrullayev brifinqdə şagirdlərə telefon qadağasının tətbiqi məsələsinə toxunaraq, bununla bağlı təhlil aparılmalı olduğunu deyib.
“Bəli, dərs zamanı telefondan istifadə etmək olmaz. Amma məktəbə gətirilməməsi ilə bağlı qayda və norma işlənməlidir. Gələcəkdə məktəbə telefon gətirilməsi qadağan oluna bilər. Amma indiki halda bu, mümkün deyil", deyə nazir bildirib.
Ramiz
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay