Rusiyanın “taxıl sazişi”ndən çıxmasından sonra dünya bazarında taxılın, əsasən də əmtəəlik buğdanın qiymətində artımların olacağı gözləniləndir. Beynəlxalq Valyuta Fondunun baş iqtisadçısı Pyer-Olivier Qurinşas yaydığı açıqlamada Rusiyanın bu addımının taxılın qiymətinin payıza doğru 10-15 faiz rtmasına səbəb olacağını bildirib. 

Liberal İqtisadçılar Mərkəzinin rəhbəri Akif Nəsirli Valyuta.az-a açıqlamasında bildirib ki, Rusiyanın “taxıl sazişi”ndən çıxmasını mexaniki olaraq buğda bazarında qiymətin artmasına təsir edən amil kimi qəbul etmək olmaz:

“Rusiya "taxıl sazişi"ndən çıxsa da, alternativ yollar var. Hazırda “taxıl sazişi” bağlanana qədər daşınan həcmin 70-80 faizi qədər ixrac davam edir. Digər tərəfdən, bu il məhsuldarlıq daha yüksək olub. Təkcə Rusiyanın özü 2021-ci illə müqayisədə, 2022-ci ildə 7 milyon ton artıq taxıl istehsal edərək, həcmi 45 milyon tona çatdırmışdı. 2023-cü ildə isə bu rəqəmin 48 milyon tona çatacağı gözlənilir. Eyni zamanda, Hindistan, Braziliya, Avropa ölkələri və Amerikada məhsuldarlıq yüksəlib. Bütün bunlar kompensasiya yaradaraq, taxılın qiymətinin qalxmasının qarşısını alır. Yalnız Ukraynadan ixrac olunan məhsulun qiyməti 5-6 faiz bahalaşa bilər. Onun isə qiymətlərə nə qədər təsir edəcəyini dəqiq proqnozlaşdırmaq çətindir. Dünyada taxıl bolluğunun olması, habelə Ərdoğanla Putin görüşü fonunda “taxıl sazişi”nin bərpa ediləcəyinin gözlənilməsi payıza doğru taxılın bahalaşmayacağını deməyə əsas verir”.

Ramiz