“Avqust ayının sonuna kimi aviabiletlərin qiymətlərində enmə gözlənilmir. Sentyabr-oktyabr aylarında səyahət üçün daha sərfəli qiymətlər tapa bilərik”.

Bunu valyuta.az-a açıqlamasında turizm eksperti, bloger Azər İsmayıl deyib.

A.İsmayıl payız aylarında daha münasib qiymətə səyahət edə biləcəyimiz 4 ölkə qeyd etdi.
A.İsmayıl bildirdi ki, payızda – “məxməri mövsüm”də Türkiyədə qiymətlər daha münasib olur: “Antalya, Alanya, İzmir, İstanbulu gəzmək olar, bu ərazilərin havası sentyabr-oktyabr aylarında mülayim olur və gəzinti üçün əlverişlidir. Biletlərin qiyməti isə öncədən alınsa, gediş-gəliş 450-500 manat təşkil edəcək”.

Blogerin sözlərinə görə, Dubay (BƏƏ) da sərfəli səyahət edə biləcəyimiz şəhərlər sırasındadır: “Əbu-Dabi şəhərinə aşağı büdcəli aviaşirkətlərdən “Wizzair” uçur. Dubaya isə oradan avtobusla 1 saata getmək olar. 50 avroya birtərəfli bilet tapmaq mümkündür. Otel 1 gecə üçün 50-70 avroya başa gələcək. Kütləvi çimərliklər pulsuzdur. Əsas xərciniz qida və nəqliyyata sərf olunacaq. İctimai nəqliyyat bir o qədər baha olmasa da, taksilər bahadır”.

Tarixi məkanları sevənlər üçün isə, A.İsmayıl payızda Özbəkistana getməyin daha düzgün seçim olduğunu bildirdi: “Özbəkistanın turizm infrastrukturu inkişaf edib. İnsanları mehriban, mətbəxləri olduqca zəngindir. Ölkədə hər qiymətə otel tapmaq mümkündür. Buxara, Səmərqənd Özbəkistanın ən məşhur və tarixi yerləridir. Bundan başqa, Xivə, Daşkənd, Fərqanə də görülməyə dəyər şəhərlərdir. Özbəkistana getmək üçün AZAL və Özbəkistan Hava Yollarından istifadə etmək mümkündür. Birbaşa gediş-gəliş bilet qiymətləri təqribən 600-650 manat olacaq”.

A.İsmayıl deyir ki, dağ turizmini sevənlər üçün Qazaxıstan yaxşı seçim olar: “Bura turizm ölkəsi kimi tanınmasa da, turizm infrastrukturu yetərincə inkişaf edib. Türkdilli ölkədir, mətbəxi zəngindir. Qədim tarixləri var. Qazaxıstan haqqında araşdırsanız, çox maraqlı gəzməli yerlər tapacağınıza əminəm. Qazaxıstana “AZAL”, “BUTA”, “Flyarystan”, “Air Astana”, “Qazaq Air” vasitəsilə getmək olar. Biletləri öncədən axtarsanız, 200-250 manata tapmaq olar. “Flyarystan” və “Buta” aşağı büdcəlidir. “Buta” Aktauya uçuş həyata keçirir. Bu şəhərdə Xəzərin sahilində dincəlmək mümkündür. Otellər çox baha deyil. “Flyarystan” isə Astanaya uçuş həyata keçirir”.
Müsahibimiz qeyd etdi ki, bu ölkələrin hamısında demək olar ki, yemək və otel qiymətləri eynidir: “Otel qiymətləri günlük 50 avro, bir dəfə yemək 10 avro, səhər yeməyi isə təqribən 5 avro təşkil edir”.

Qarakişi Vəlizadə