"Turizm sektorunda qiymətlərin baha olmasının obyektiv və subyektiv səbəbləri var”.

Bu sözləri Valyuta.az-a iqtisadçı Xalid Kərimli deyib. İqtisadçı bildirib ki, turizm sektorunda qiymətlərin baha olduğunu desək də, baha qiymətlərin də öz alıcıları var:

“Çünki baha satılan alınmazsa, bu zaman qiymət ucuzlaşar. Amma o baha qiyməti alan şəxslər olduğu üçün qiymətlər yüksəkdir. Yəni sahibkarın bazarı var deyə davam edirlər".

Xalid Kərimlinin sözlərinə görə, baha olan yerdə problem də var demək deyil:

“Məsələn, mən bu yaxınlarda Avropada gördüm ki, bizim otel otaqlarından pis olan otaqlar beş dəfə baha qiymətədir. Halbuki, Avropanın gözəl şəhərləndən biri idi, oteldəki mebellər də 80-90-ci illərdən qalmışdı".

Ekspert bildieib ki, Azərbaycanda turizm mövsümünün müddəti azdır:

“Yay turizmində cəmi iki-üç ay obyektlərin real işləmək gücü olur. Qış turistik məkanları dekabrdan marta qədər işləyir. Bu obyekt sahibləri də 3-4 aya qoyduqları xərcləri çıxara bilmir. Ona görə də xidmətlərini baha satmalı olurlar. Azərbaycan turizminin ən böyük problemlərindən biri budur”. 

Ekspertin sözlərinə görə, Azərbaycanda turizmin baha olmasınınn digər səbəblərindən biri turist sayının az olmasıdır:

“Sahibkarlar zərərəsizlik nöqtəsi müəyyənləşdirir. Baxır ki, otelinin doluluq səviyyəsi 30 faizdir. O bu qədər faizlə həm pul xərclərini qarşılamalı, həm də pul qazanmalıdır. Ona görə də pulunu daha az olan müştəridən çıxarır. Əgər sahibkar bilsə ki, onun istirahət mərkəzinə gələn turist çoxdur, ilboyu işləyəcək, bu zaman daha yaxşı qiymət siyasəti həyata keçirəcək". 

Xalid Kərimli daha bir səbəb kimi tikinti, investiya xərclərinin çox olmasını göstərib:

“Burada müxtəlif obyektiv və subyektiv səbəblər var. Biz Türkiyə ilə müqayisə edə bilmərik. Nəzərə almaq lazımdır ki, Azərbaycanda yerli istehsal olmadığına görə otel tikintisində, təminatında qiymətlər Türkiyədən azı 40 fazi baha başa gəlir. Bizdə bütün məhsul xaricdən alınır".

Ekspertin sözlərinə görə, əsas səbəblərdən biri də rəqabət mühitinin pis olmasıdır:

“Baha olmasının digər səbəbi də belə turistik məkanların az olmasıdır. Azdır deyə baha satırlar, çox da açmaq istəmirlər, ona görə ki, elə də rentabelli sahə deyil. Bütün ili işləmədiklərinə görə risklər və xərclər baryeri çoxdur”.

Davud