“Azərbaycan Dəmir Yolları” QSC, “Qazaxıstan Dəmir Yolları Milli Şirkəti” SC və “Gürcüstan Dəmir Yolları” SC arasında birgə müəssisənin yaradılması və fəaliyyətinin əsas prinsipləri haqqında Saziş” imzalanıb. Sənədə baş nazir Əli Əsədovun Bakıda rəsmi səfərdə olan Qazaxıstanın baş naziri Alixan Smailov ilə görüşü çərçivəsində imza atılıb.

Valyuta.az-a açıqlamasında iqtisadçı ekspert Fuad İbrahimov bildirir ki, imzalanan saziş Azərbaycanda yükdaşımanın həcminin dəfələrlə artmasına şərait yaradacaq:

“Dünyada elə ölkələr var ki, təkcə tranzit yük daşınmadan əldə olunan gəlirlərilə büdcəsinin əsaslı hissəsini təmin edir və bu hal makroiqtisadi cəhətdən ölkənin idarə olunmasına müsbət təsir göstərir. Hazırda ən elastik dəhliz Azərbaycan ərazisindən keçir. Bu mənada Azərbaycan, Gürcüstan və Qazaxıstan dəmir yolları təşkilatları arasında imzalanan saziş nəticəsində ölkəmizdə yükdaşımaların həcmi dəfələrlə artacaq. 

Artım da öz növbəsində tranzit keçidlərindən gələn gəlirlərin çoxalması ilə nəticələnəcək. Eyni zamanda, yük aşırma gücünün artımı ilə bir o qədər ona xidmət edən infrastrukturlar da artacaq. Proses dəmir yoluna xidmət və ona yardımçı sahələr üzrə yeni iş yerlərinin açılmasına, yardımçı təsərrüfatların yaradılmasına da stimul yaradacaq. Yəni imzalanan bu saziş birtərəfli gəlir mənbəyi deyil, şaxələnmiş gəlir mənbəyinə çevriləcək bir layihə olacaq”.

Ramiz