"Azərbaycan dolayısı ilə, Qərbin Rusiyaya qarşı gözlənilən sanksiyalarından mənfəət götürə bilər”.

Bunu Qaynarinfo-ya açıqlamasında iqtisadçı ekspert Fuad İbrahimov Ukrayna ətrafında cərəyan edən gərginlik fonunda Qərbin Rusiyaya qarşı daha ciddi sanksiyalara əl atacağı halda, mövcud vəziyyətin Azərbaycan iqtisadiyyatına da təsirindən danışarkən deyib.

O baxımdan, ekspert bu qənaətdədir ki, şimal ölkəsinə yönəlik sözügedən sanksiyaların Azərbaycan iqtisadiyyatına heç bir ciddi mənfi təsirləri olmayacaq: 

"Qərbin Ukrayna məsələsilə bağlı Rusiyaya münasibətdə tətbiq edə biləcəyi növbəti sanksiyaların Azərbaycana da hər hansı bir mənfi təsir göstərəcəyini düşünmürəm. İqtisadiyyatda müxtəlif vəziyyətlərə uyğun müxtəlif alətlər də olur. Qonşuluq münasibətlərinə cavab verməsə də, hesab edirəm ki, Rusiyaya ola biləcək sanksiyalardan əksinə, Azərbaycan daha çox mənfəət götürə bilər. Nəzərə alaq ki, hazırda Azərbaycan ərazisi, ölkəmizin xarici siyasəti və mövqeyi Rusiya üçün diversifikasiya olunmuş dəhliz hesab olunur”. 

Həmsöhbətimiz qeyd edir ki, Rusiyaya yönəlik istənilən ağır sanksiyalar dolayı yolla olsa da, rus işgüzar dünyasının Qərbə çıxmasına təkan verəcək. Bu yollardan ən optimalı isə F. İbrahimova görə, Azərbaycandır: 

"İstər infrastruktur, istər maliyyə institutları nöqteyi-nəzərindən, istərsə də Bakı ilə Moskvanın xoş qonşuluq siyasəti və bağlanan ikitərəfli əlaqələr istiqamətindən yararlanaraq Rusiya prosesdən öz marağı naminə faydalana bilər. Sözsüz ki, bu fonda Azərbaycan da prosesdən mənfəət götürə bilər. 
Bu nöqteyi-nəzərdən hesab edirəm ki, Rusiyaya qarşı növbəti sanksiyalar fonunda Azərbaycan iqtisadi cəhətdən daha səmərəli vəziyyət əldə edə bilər. Yəni bu sanksiyalar Rusiya ilə iqtisadi əlaqələrimizin zəifləməsinə gətirib çıxarmayacaq. Uzağı Rusiyadan ölkəmizə silah-sursat satışı azalar. Amma müasir dövrdə bunlardan yan keçmək də mümkündür. Rusiyaya hər hansı sanksiya qoyulduqda, rus şirkətləri öz məhsullarını Azərbaycan ərazisində milliləşdirməklə, başqa kodla dünya bazarlarına çıxa bilərlər”. 

Bəs Rusiyaya mümkün sanksiyalar Ermənistan iqtisadiyyatına necə təsir göstərə bilər? Məlumdur ki, Ermənistan iqtisadiyyatının vəziyyəti daha çox Rusiya iqtisadiyyatından asılıdır. Xüsusilə, Rusiya Ermənistana maliyyə axınına görə ənənəvi olaraq lider olaraq qalır, keçən ilin 11 ayı ərzində ondan Ermənistana 781 milyon dollar köçürülüb. Respublikada Rusiya kapitalının iştirakı ilə çoxsaylı iri müəssisələr fəaliyyət göstərir.

Rusiyaya mümkün sanksiyaların Ermənistan iqtisadiyyatına necə təsir göstərə biləvəyi mövzusunda danışan "Alternativ” tədqiqat mərkəzinin rəhbəri, iqtisad elmləri doktoru, professor Tatul Manaseryan da Sputnik Ermənistan-a müsahibəsində Ermənistanın təsir göstərməyəcəyini deyib:

"Sırf Ermənistana qarşı Qərbin sanksiyalarının tətbiqi gözlənilmir. ABŞ və Rusiya arasında rəqabətin yaratdığı gərginliyə səbəb olan, dünyanın güc mərkəzi sayılan Rusiyadan fərqli olaraq, Ermənistan belə problemlərlə üzləşməyəcək”.