Ukrayna Azərbaycan qazını Rumıniya üzərindən idxal edə bilər
Ukrayna Azərbaycanın TAP layihəsi vasitəsilə ixrac etdiyi təbii qazı Rumıniya vasitəsilə idxal edə bilər.
“Report” Profit.ro-ya istinadən xəbər verir ki, bunun üçün Yunanıstan və Bolqarıstan TAP kəmərini Rumıniya qaz nəqli şəbəkəsinə qoşmaq üçün lazımi sərmayələr yatırmalıdır.
Belə ki, Rumıniyanın Ukraynaya 2026-cı ildən etibarən gündəlik 6,9 milyon kubmetr qaz tədarük etməsini nəzərdə tutan layihəyə Rumıniyanın “Transgaz” dövlət şirkəti 300 milyon, Ukraynanın GSTO qaz nəqli operatoru da 35 milyon avro yatırmaq niyyətindədir. Artıq hazır olan həmin layihə martda ictimaiyyətin müzakirəsinə çıxarılacaq.
Bununla yanaşı, 2026-cı ilin sonu – 2027-ci ilin əvvəllərində Rumıniyanın “Romgaz SA” və “Exxon” arasıdna müvafiq müqavilə imzalanarsa və “Ofşorlar qanunu”na lazımi dəyişikliklər gətirilərsə, Qara dənizdə Rumıniyaya aid “Neptun Deep” qaz yatağında hasilata başlana bilər.
“Ryastad” məşvərətçi şirkətinin dəyərləndirilməsinə görə, Rumıniyada təbii qaz hasilatı 2020-ci ildəki 8,7 milyard kubmetrdən 2027-2029-cu illərdə 14-15 milyard kubmetrə qədər artırıla bilər. Bununla da, ölkə daxili hasilatın 20-25%-ni hətta ixrac da edə bilər.
Xatırladaq ki, Bolqarıstanla Yunanıstanın qaz nəqli şəbəkələrini birləşdirəcək İGB interkonnektorunun tikintisini cari ilin 1 iyul tarixinədək başa çatdırmaq nəzərdə tutulur. Yunanıstanın şimal-şərqində TAP layihəsinə qoşulacaq İGB-nin uzunluğu 182,6 km-dir ki, bunun 150 km-lik hissəsi Bolqarıstan ərazisindən keçəcək. Kəmərin illik ötürmə gücü 3-5,5 milyard kubmetr, gələcəkdə isə 10 milyard kubmetr təşkil edəcək.
Türkiyədən Yunanıstan, Albaniya vasitəsilə Adriatik dənizinin dibilə İtaliyanın Salento sahillərinə gedib çıxan TAP layihəsi vasitəsilə Avropaya ildə 8 milyard kubmetr Azərbaycan qazı nəql edilir.
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay