"Azərbaycanda böyük şəhərlər üzrə təxminən 6-7 min, bəlkə də daha çox rieltor (makler) var. Bu sahədə minlərlə adamın işləməsinə baxmayaraq, rəsmi dövlət statusu yoxdur".

Bunu əmlak məsələləri üzrə ekspert Elnur Fərzəliyev deyib. 

Onun sözlərinə görə, rieltorlarla bağlı ölkədə eyni zamanda tənzimləyici , maarifləndirici kurslar da mövcud deyil:

"Hər bir rieltor özünün, alıcının, satıcının hüquqlarını bilməli, sənədləşmə proseduruna bələd olmalıdır. Bu sahədə işləyənlərin böyük əksəriyyəti isə kənardan gələnlərdir - kimsə işdən çıxıb gəlir və ya ikinci iş kimi bununla məşğul olmağa başlayır. Ümumiyyətlə, bu sahə qanunvericiliklə tənzimlənsə, işləyənlər öz vəzifə borclarını dərk etsələr, mövcud problemlər öz həllini tapa bilər. Peşə ilə məşğul olan insanın tək evi göstərməklə işi bitmir. Bunun hüquqi, marketinq tərəflərini, müştərilərlə davranışın hansı formada təşkil edilməsini bilməlidir”. 

Ekspert, hazırda rieltorların çoxunun qanunsuz fəaliyyət göstərdiyini qeyd edib:

“Bu istiqamətdə qanun olmadığına görə, onlar ya xidmət sahəsi kimi VÖEN üzərindən fəaliyyət göstərə bilərlər, ya da şirkət (MMC) olaraq. Təsəvvür edin, minlərlə rieltorların hər biri ay ərzində kiçik də olsa əməliyyat aparırlar - ev, obyekt, torpaq və s. satırlar, kirayə verirlər. Onlar əgər rəsmi işləsələr, hər ay dövlət büdcəsinə nə qədər gəlir gedər".

Müsahibimiz qeyd edib ki, bu gün vətəndaşların böyük əksəriyyəti evlərini rieltorlara satmırlar:

"Rieltorların hamısı kənardan gəlməyib, işin içində bişənlər, mütəxəssislər də var. Bu gün sahibkarlar öz evlərini elan saytlarına yerləşdirirlər və müştəri birbaşa ev sahibi ilə əlaqə qurur. Yaxud tikinti şirkətləri də elan saytlarından istifadə edirlər. Müştərilər artıq rieltorsuz evləri alıb-satırlar. Bu isə rieltorların maddi gəlirlərinə ziyan vurur, eyni zamanda müştərilər də sahəni bilmirlər. Lakin vətəndaşın yanında mütləq mütəxəssis olmalıdır ki, sənədləri yoxlasın - məsələn, qeydiyyatda adamlar qala bilər və bu da sonradan problemlərə səbəb olar.

Təəssüf ki, işini bilməyən rieltorların sayı daha çoxdur və onlara görə bir çox vətəndaşlar əziyyət çəkirlər. Etibar edib inanır, pulu verir, sabah bir problemlə üz-üzə qalır. Bu gün yeni tikili binalarda komendatlar, qaravulçular da alqı-satqı ilə məşğul olur. İstənilən adam bu sahə ilə qazanc əldə etməyə çalışa bilər. Amma qeyd etdiyim kimi qanunvericilik olsa və sahəyə nəzarət edilsə, status verilsə, rieltorlar rəsmi sertifikasiya olunsalar, kurslar keçsələr, vətəndaş ona xidmət edən şəxslərin mütəxəssis olub-olmadığını biləcək".

Mənbə: Sfera.az