ABŞ-ın texnologiya nəhəngi Microsoft Windows 11-in istifadəyə vermə tarixini açıqladıqdan sonra, bu dəfə yeni xəbərlə gündəmə gəlib.

Şirkət videoları redaktə edən tətbiqi proqram Clipchamp-ı aldığını açıqlayıb.

Sövdələşmənin qiyməti barədə məlumat verilməsə də, bu razılaşma Microsoft-un həm fərdi, həm də korporativ müştərilər üçün təklif etdiyi proqram təminatında yeni mərhələ olacaq. Şirkət avqustun ortalarında Office 365 paketi üçün illik abunə qiymətlərini 2022-ci ildən etibarən artıracağını, lakin həm də bir sıra təkmilləşdirilmiş yeniliklər əlavə edəcəyini açıqlamışdı. Clipchamp-ın da bu paketə daxil ediləcəyi gözlənilir.

2013-cü ildə Avstraliyada qurulan startap olan Clipchamp hazırda 390 mindən çox şirkətdə istifadə olunur və 17 milyon qeydyyatdan keçmiş istifadəçisi var. Bu isə ötən ilə nisbətən 54% artım deməkdir. İri müştərilər arasında Google, Microsoft, Deloitte, Zendesk və başqaları da var. Şirkət Facebook, Instagram və TikTok-da paylaşılan videolar üçün 9:16 nisbətində redaktə xidmətlərinin satışını 140% artırıb.

Xatırladaq ki, bir neçə həftə əvvəl daha bir texnologiya şirkəti Adobe videolara əlavələr etməyə imkan verən Frame.io proqramını 1,3 milyard dollara alacağını açıqlamışdı.

Clipchamp video yaratmaq və redaktə etmək üçün məhsuldur (paket). Mükəmməl funksionallıq və geniş "kitabxanası", mətn və rəng ilə istifadə etmək inanılmaz dərəcədə asandır.

Mənbə: Marja.az