Avrozonada pərakəndə satış, xidmət və sənaye sektorlarına dair fundamental göstəricilərin son zamanlar zəif açıqlanmasından sonra cümə axşamı yayımlanacaq yeni faiz qərarı və saat 16:30-da baş tutacaq “ECB”-nin mətbuat konfransı öncəsi EURUSD məzənnəsində korreksiya başlayıb. Geriləmə 1.1760-a kimi dərinləşə bilər. 

Valyuta.az xəbər verir ki, bununla yanaşı, bu həftə çərşənbə axşamı Bakı vaxtı ilə saat 13:00-da Avrozona və Almaniyadan gələcək inkişaf perspektivlərini ölçən indeksinin dərci də investorların diqqət mərkəzində olacaqdır.

GBP

GBP/USD məzənnəsində də eyni mənzərə müşahidə edilir və ucuzlaşma 1.3712 səviyyəsinə kimi davam edə bilər. 

Burada isə ticarətçilər daha çox cümə günü Bakı vaxtı ilə saat 10:00-da İngiltərənin sənaye, xarici ticarət dövriyyəsi və iqtisadi inkişafı ilə bağlı açıqlanacaq önəmli fundamental göstəricilərinə kökləniblər. 

TRY

Türkiyə iqtisadiyyatının ikinci rüb üzrə inkişafının 22%-ə çatması xəbərləri ilə lirə bahalaşsa da son inflyasiya rəqəmlərindən sonra dollar lirəyə qarşı güc toplayıb. Təhlillərə əsasən, USDTRY məzənnəsi keçən həftənin ortalarına - 8.36TL-yə kimi bahalaşa bilər. Lakin ümumi proqnozlar lirənin bahalaşmaqda davam edə biləcəyi istiqamətindədir. 

Cümə günü saat 11:00-da Türkiyədə dərc ediləcək işsizlik rəqəmləri də böyük maraqla gözlənilməkdədir. 

OIL

Enerji birjalarında demək olar ki, son altı ilin maksimumlarında ticarət edilən Brent neftinin bir barel qiyməti 74$-da yenidən müqavimətlə rastlaşaraq 72$-a kimi geriləyib və ucuzlaşma 68$-a kimi davam edə bilər. 

Cümə axşamı saat 19:00-da dərc ediləcək ABŞ-ın neft ehtiyatları ilə bağlı göstəriciləri bu həftə də treyderlər tərəfindən böyük maraqla gözlənilir. 

GOLD

ABŞ-ın monetar siyasətini sərtləşdirəcəyi xəbərləri, qızılın 2 ayın maksimumunda yenidən müqavimətlə rastlaşmasına səbəb olub. Bu, bir unsiya üzrə qiymətin 1814$-ın (58.3 $/qram) qırılması ilə 1778$-a (57.2 $/qram) kimi ucuzlaşması ilə nəticələnə bilər. 

Qeyd edək ki, məlumat Azərbaycanın İnvestAZ İnvestisiya şirkətinin analitikləri tərəfindən hazırlanıb.