Neft qiymətləri yenidən azalıb. Buna səbəb dünyada yeni növ koronavirusun "Delta" variantına yoluxanların sürətlə artmasının tələbə mənfi təsir edəcəyinə dair narahatlıqlardır. Bakı vaxtı ilə saat 08:09-da "Brent" nefti 2,3% ucuzlaşma ilə 67,47 dollardan, ABŞ xam nefti isə 3,5% ucuzlaşma ilə 64,28 dollardan ticarət olunub. "Brent" markalı nefti avqust ayında təxminən 11%, iyulun əvvəlindən təxminən 13% ucuzlaşıb.

Valyuta.az xəbər verir ki, bununla bağlı Cebhe.info-ya danışan neft və qaz məsələri üzrə ekspert Zəfər Vəliyev bildirib ki, neftin qiymətlərinin aşağı düşməsi pandemiya ilə əlaqədardır:

“Ümumiyyətlə, bu ilin əvvəllərində keçən il ilə müqayisədə neft qiymətlərində kifayət qədər artım dinamikası müşahidə olundu. Dünya üzrə ilin birinci rübündə neftə olan gündəlik təlabat təxminən 90 milyon barel civarında dəyərləndirilirdi. Bu isə qarşıdakı aylarda neftin qiymətinin artmasına bir işarə idi. Artıq bir həftəyə yaxındır ki, neftin qiymətlərində enmələr müşahidə olunur”.

Ekspert hesab edirəm ki, indiki dəyər həm neft istehsalçıları, həm də neft istehlakçıları üçün ədalətli qiymətdir: 

“Hətta iddia edirdilər ki, ilin sonuna kimi neftin bir barelinin qiyməti 100 dollara qalxacaq. Bunun üçün də kifayət qədər ciddi əsaslar da vardı. Proqnozlar onu göstərirdi ki, 2021-ci ildə dünya üzrə neftə olan təlabat 2020-ci il ilə müqayisədə təxminən 6,7 milyon barel artım gözlənilirdi. Yəni ilin sonuna kimi dünyanın neftə olan təlabatı 96,7 milyon barel civarında dəyərləndirilirdi. Neftin qiymətinin kəskin qalxmasının səbəb isə ABŞ, Çin və digər ölkələrdəki pandemiyanın yayılma tempində artım olması ilə bağlıdır. Bu isə yeni karantin tədbirlərinin görünməsiylə birlikdə, neft və neft məhsullarına olan təlabatı azalmasına səbəb olur”.

Ekspert neft qiymətlərinin aşağı düşməsində Çin amilini də xüsusi vurğulayıb:

“Cari ilin iyul ayında Çinin neft idxalı iyun ayı ilə müqayisədə aşağı düşüb. Eyni zamanda iyul ayından başlayaraq Çin hökuməti özəl neft emalı zavodlarına illik neft idxalı kvotalarını 30 faiz aşağı saldı. Bu əsasən Çin bazarında neft məhsullarının artması ilə əlaqədardır. Digər problem isə Çindəki müstəqil emal güclərinin kütləvi şəkildə vergidən yayınma hallarının sübut edilməsilə bağlıdır.

Qarşıdakı aylarda da, Avropa və Asiya bazarında neftə olan təlabatda ciddi bir artım müşahidə olunmayacaq. Hazırda nəzəri cəhətdən neft təlabatında artım var, amma neft emalı zəncirində bir qırılma var. Neftin ədalətli qiyməti indi olduğu kimi 68 dollardır”.