“Bank of America”nın sorğuları göstərir ki, investorlar bazarlarda 37 % təhdidi inflyasiyanın sürətlənməsindən və 33 % isə FED-in monetar siyasəti sərtləşdirməsindən sonra bazarlarda mümkün isterikada görürlər. 

Valyuta.az xəbər verir ki, bunu İqtisadi İslahatların Təhlili və Kommunikasiya Mərkəzinin rəhbəri Vüsal Qasımlı bildirib. 

Dünya iqtisadiyyatında baş verən proseslərin Azərbaycana təsirləri barədə danışan V.Qasımlı, FAO-nun Ərzaq Qiyməti İndeksinin bu ilin mayında ötən illə müqayisədə 39,7% yüksək olduğunu söyləyib.

Mərkəz rəhbəri, ərzaq səbətini təşkil edən bitki yağının, taxılın, şəkərin, ət və süd məhsullarının da dünya bazarlarında bahalaşdığını diqqətə çatdırıb: 

“Enerji qiymətləri də yüksəlməkdə davam edir. Azərbaycanın ixracında enerji və ərzaq məhsulları üstünlük təşkil etdiyindən, bu məhsulların qiymətinin bahalaşması ixrac gəlirlərini artırır. Məsələn, bu ilin ilk dörd ayında müqayisəli qiymətlərlə Azərbaycanın ixracı 8,3 % azalsa da, faktiki qiymətlərlə 25,1 % artıb. Yəni bizim ixracın fiziki həcminin azalmasına rəğmən, ixrac məhsullarının bahalaşmasına görə dəyəri artıb”.

Onun sözlərinə görə, eyni şəkildə qeyri-neft ixracı müqayisəli qiymətlərlə 10,7 %, amma faktiki qiymətlərlə 27 % artıb: 

“Maraqlıdır ki, Azərbaycanın idxal etdiyi məhsulların da qiyməti bahalaşıb. Məsələn, biz bu ilin ilk dörd ayında 18,9 % az idxal etsək də, faktiki qiymətlərlə idxal 4,3 % artıb. Hesablamalar göstərir ki, Azərbaycanda ixrac məhsulları, idxal məhsularına nisbətən daha çox bahalaşıb ki, bu da cari əməliyyatlar hesabına müsbət təsir göstərir. Bu həm də manatın real effektiv məzənnəsinin yüksəlməsinə təsir deməkdir”.