Yaxın Şərqin ən böyük aviaşirkəti olan Birləşmiş Ərəb Əmirliklərinin "Emirates" keçən il koronavirus pandemiyası çərçivəsində tətbiq edilən məhdudiyyətlərə səbəbindən 5,5 mlrd. ABŞ dolları məbləğində zərərlə üzləşib.

Valyuta.az "APA-Economics"ə istinadən xəbər verir ki, bu barədə aviaşirkətin "Twitter" səhifəsində deyilir.

Qeyd olunub ki, son bir ildə koronavirusun səbəb olduğu qlobal səyahət məhdudiyyətlərinə görə aviaşirkətin gəlirləri 66%-dən çox azaldığına görə xalis zərər 5,5 mlrd. dollar təşkil edib. Şirkətin gəliri 8,4 mlrd. dollar, sərnişin laynerləri və yük təyyarələrinin dolum səviyyəsi isə 58% azalıb.

Xatırladaq ki, 2020-ci ilin martında pandemiya səbəbindən BƏƏ-də hava limanlarının bağlanması və eyni zamanda dünyanın ən işlək beynəlxalq nəqliyyat mərkəzlərindən biri olan – Dubay aeroportundan tranzit uçuşların dayandırılmasından sonra "Emirates" bütün sərnişin uçuşlarını bir neçə həftəlik dayandırmaq məcburiyyətində qaldı.

Şirkət 2019-cu ili 288 mln. dollarlıq mənfəətlə başa vurmuşdu.