“Azərbaycanda əhalinin 7%-i 65 yaşdan yuxarıdır. Deməli, 7% əhali pensiya ala bilir”.

Valyuta.az-ın APA-ya istinadən verdiyi məlumata görə, bunu Milli Məclisin bu gün keçirilən iclasında “Əlilliyi olan şəxslərin hüquqları haqqında” qanuna təklif edilən dəyişikliklərin müzakirəsi zamanı deputat Qüdrət Həsənquliyev deyib.

Deputat bildirib ki, deməli Azərbaycanda orta yaş aşağıdır: 

“Buna görə də Azərbaycanda pensiya yaşını aşağı salmaq lazımdır. İnsanlar DSMF-yə pul ödəyir. Bir çox insan bu qanun layihəsini mütərəqqi adlandırır. Bu o zaman mütərəqqi olardı ki, faiz dərəcələrinə uyğun pensiya verilərdi. Yəni 31%-lə 60% eyni pensiya alacaq?! Burada 100% sağlamlığın itirilməsi ölüm deməkdir. Ona görə də burada sağlamlığın itirilməsi nəticəsində əmək qabiliyyətinin itirilməsinə görə pensiya təyin edilsin. 

İkincisi, nazirlik bu dəyişikliklərdən əvvəl bizə maliyyə əsaslanması təqdim etməliydi. Komitə sədri Musa Quliyev ötən iclasda dedi ki, bəlkə də bu qanunun qəbulundan sonra əlillərin sayı artacaq. Bu gün mən də deyirəm ki, ola bilsin əlilliyi olanların, əlilliyə görə pensiya alanların sayı azalacaq. Bu kimi hallar olmaması üçün nazirlik bizə maliyyə əsasnaməsi təqdim etməliydi. Biz bilməliydik ki, nə qədər vəsait artacaq, yaxud azalacaq”. 

Onun fikrincə, insan əmək qabiliyyətini 100% itirilsə də, yaşaya bilər: 

“Amma qanunda qeyd edildiyi kimi 81-100% orqanizmin funksiyası itirilməsi hissəsində 100% ölüm deməkdir. Nazirlikdən bu suallara cavab gəlmədikcə, mən bu qanun layihəsinin lehinə səs verməyəcəm”.