“Nə üçün Azərbaycanda Aİ-95 istehsal edilmir?” - Deputatdan SUAL
Milli Məclisin deputatı Naqif Həmzəyev Aİ-95 markalı benzinin qiymətinin qalxmasından danışıb.
Valyuta.az-ın verdiyi xəbərə görə, deputat Modern.az-a açıqlamasında, qiymət artımının sürücülər üçün heç də yaxşı xəbər olmadığını qeyd edib.
Bu məsələnin sürücülərimizi, vətəndaşlarımızı istər-istəməz narahat etdiyini deyən N.Həmzəyevin sözlərinə görə, həm də sual doğuran məqamlar var:
“Bu növ benzin nə üçün bu günə qədər Azərbaycanda istehsal edilmir? Axı biz neft ölkəsiyik, xaricə neft ixrac edirik. Bizim bu benzin növünü istehsal etmək üçün kifayət qədər imkanımız var. Əgər istehsal etsəydik, qiymət artımı olmazdı və sürücülər bu qədər böyük xərcə düşməzdi”.
Deputat qeyd edib ki, hər dəfə benzinin qiyməti qalxdıqdan sonra bir sıra məhsullarda, xüsusilə ərzaq məhsullarında süni qiymət artımının şahidi oluruq:
“Biz istəməzdik ki, belə bir hal olsun. Düşünürəm ki, aidiyyatı qurumlar çalışmalıdır ki, digər məhsullarda süni qiymət artımının qarşısı alınsın və əhalimiz çətin vəziyyətə düşməsin”.
Bu gündən Azərbaycanda Aİ-95 premium markalı benzinin qiyməti 1.40 AZN olub. Qiymət artımına qədər Aİ-95 benzini 1.25 AZN idi.
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay