Bir neçə saat sonra Rusiyanın baş naziri Mixail Mişustin və Azərbaycanın baş naziri Əli Əsədov Moskvada görüşərək bir neçə sahədə danışıqlar aparacaqlar. 

Valyuta.az xəbər verir ki, Rusiya Kabinetinin mətbuat xidmətinin yaydığı məlumatda, danışıqlardan sonra iki ölkə arasında əməkdaşlığın inkişafı ilə bağlı bir sıra sənədlərin imzalanacağı bildirilir. 

Qeyd edilir ki, hökumət başçıları arasında Rusiya-Azərbaycan ticarət-iqtisadi əməkdaşlığının aktual məsələlərinin, eləcə də nəqliyyat, sənaye, enerji, mədəni və humanitar sahələrdə birgə layihələrin həyata keçirilməsi barədə müzakirələrin aparılması planlaşdırılır. 

Həmçinin Rusiya hökuməti rəhbərinin görüşdə koronavirus infeksiyasına qarşı xüsusi diqqət verəcəyi gözlənilir.

Qeyd edək ki, Ə.Əsədov dünən axşam Rusiyaya rəsmi səfər edib. Onun  M.Mişustinlə ilk şəxsi görüşü olacaq. Bundan əvvəl onlar bir neçə dəfə telefonla əlaqə qurublar və MDB Hökumət Başçıları Şurasının iclaslarında video-görüş vasitəsi ilə müzakirələr aparıblar.

Tərcümə etdi: Rövşən Ziya