İqlim dəyişikliyinin yaratdığı ekstremal təbiət hadisələri 2014-2023-cü illər arasında qlobal iqtisadiyyata 2 trilyon dollardan çox ziyan vurub.

Valyuta.Az xəbər verir ki, "Beynəlxalq Ticarət Palatası"nın ("ICC") hazırladığı hesabata əsasən, 2014-2023-cü illərdə baş verən şiddətli yağış, daşqın və torpaq sürüşməsi kimi 4 mindən çox ekstremal təbiət hadisəsi təhlil edilib.

Hesabata görə, bu dövrdə dünyada ekstremal təbiət hadisələrinin vurduğu ziyan 2 trilyon dolları keçib. Yalnız son iki ildə bu hadisələr qlobal iqtisadiyyata 451 milyard dollar itki gətirib.

ABŞ, təxminən 935 milyard dollarla bu dövrdə ən böyük iqtisadi itkiyə məruz qalan ölkə olub, onu 268 milyard dollarla Çin və 112 milyard dollarla Hindistan izləyib.

Yaponiya, Almaniya, Avstraliya, Fransa və Braziliya kimi ölkələr də ən çox iqtisadi zərər görən ilk 10 ölkə arasında yer alıb.

2014-2023-cü illər arasında baş verən bu təbiət hadisələrindən təxminən 1,6 milyard insan zərər çəkib.

"ICC"nin baş katibi Con Denton, "Son 10 ilin məlumatları iqlim dəyişikliyinin gələcəyin problemi olmadığını və ekstremal təbiət hadisələrinin iqtisadi təsirlərinin bu gün də ciddi şəkildə hiss edildiyini" bildirib.

Rəhim