Kənd təsərrüfatı məhsullarının qiyməti son 9 ilin ən yüksək səviyyəsinə yüksəlib. 

Valyuta.az Sfera.az-az xəbər verir ki, beynəlxalq Kənd Təsərrüfatı İndeksi 2012-ci ildən sonrakı ən yüksək səviyyəyə çatıb.

Kənd təsərrüfatı məhsullarının bahalaşması son aylarda təklifin azalması qorxusu ilə yüksəlir. Son dövrdəki ümumi qiymət artımına soyanın bahalaşması öncülük edib. Argentinadakı yağışlar soya əkininə, ABŞ-dakı soyuq hava isə soya yığımına mənfi təsir göstərib. Zəif təklifə nisbətən Çindən güclü tələbin gəlməsi soya qiymətlərini artırır. Hazırkı soya qiymətləri son 10 ilin ən yüksək səviyyəsinə çatıb. 

Soya ilə bərabər buğda və qarğıdalı da quraqlıq və soyuq hava şəraiti ilə əlaqədar bahalaşır. 

Buğda qiymətləri həm ABŞ, həm də Rusiyadakı əlverişsiz hava şəraitinin olması və bunun təklifdə yaratdığı təsirlə artır. Hazırkı buğda qiymətləri 2014-cü ildən bu yana ən yüksək səviyyədədir.

Brazilya və ABŞ-da quraqlıq səbəbindən qarğıdalı əkinləri gecikir. Bu vəziyyət qarğıdalı qiymətlərinin 2013-cü ildən bu yana ən yüksək səviyyəyə qalxmasına kömək edib. 

Son aylarda yaranmış vəziyyətlə əlaqədar sərmayəçilər də kənd təsərrüfatı mallarının bir qədər də bahalaşacağı gözləntisinə kökləniblər. Bu gözləntilər də bahalaşmaya əlavə təkan yaradır. 

Birja analitiklərinin şərhlərinə görə, kənd təsərrüfatı məhsullarının bahalaşması qlobal ərzaq qiymətlərinin yüksəlməsinə səbəb olur. Analitiklər qida məhsullarının qiymətinin artmasının isə qlobal bahalaşmanı gücləndirəcəyindən narahatdırlar.