"Gəncə Avtomobil Zavodu" (GAZ) İstehsalat Birliyi Belarus şirkətləri ilə əməkdaşlığı bundan sonra da sıx davam etdirəcək.

Valyuta.azın Report.az-a istinadən verdiyi məlumata görə, bunu müəssisənin Müşahidə Şurasının sədri Xanlar Fətiyev bildirib.

Onun sözlərinə görə, GAZ bu ilin sonuna kimi Minsk Traktor zavodu ilə 1 000 ədəd traktorun və BELAVTOMAZ konserni ilə isə 7 ədəd ağır tonnajlı avtomobilin yığılması üçün komplekləşdiricilərin göndərilməsi ilə bağlı müqavilə imzalayıb.

"2006-cı ildə Prezident İlham Əliyevin Belarusa rəsmi səfərindən sonra bu ölkənin şirkətləri ilə müntəzəm əməkdaşlıq davam edir. Müəssisəmiz Belarus-Azərbaycan iqtisadi əlaqələri çərçivəsində fəaliyyətini xeyli genişləndirib. Hazırda 6-7 Belarus şirkəti ilə sıx əməkdaşlıq edirik. Aprelin 13-14 də Belarus prezidenti Aleksandr Lukaşenkonun Bakıya işgüzar səfəri zamanı bağlanılan ikitərəfli əməkdaşlıq sazişi çərçivəsində daha bir neçə müqavilə imzalanıb ki, bu da müəssisəmizin inkişafında xüsusi rol oynayacaq”, - X.Fətiyev qeyd edib.

Müşahidə Şurasının sədri onu da bildirib ki, bu əməkdaşlıq çərçivəsində digər layihələr üzrə də işlər davam etdiriləcək. Belə ki, sifarişlər olduğu təqdirdə bütün növ texnikaların yığımını reallaşdırmaq mümükün olacaq.