“Elberg” şirkəti Hacıqabul Sənaye Məhəlləsində tikinti materialları üçün avadanlıqları istehsal edən zavodu işə salıb.

Valyuta.az İnterfax.az-a istinadən xəbər verir ki, bu barədə müəssisənin direktoru Mais Qasımov bildirib.

Onun sözlərinə görə, zavodda tikinti materialları - gips, əhəng, kərpic, alçipan və digər inşaat materialları istehsal ediləcək. 

“Zavoda 12 milyon manat sərmayə yatırılıb. Müəssisədə Türkiyə, Yaponiya və Finlandiya istehsalı olan avadanlıqlar quraşdırılıb. Burada 100 yeni iş yeri yaradılıb”, - deyə Qasımov qeyd edib.

Direktor əlavə edib ki, şirkətə investisiya təşviqi sənədi də verilib.

Qeyd edək ki, “Elberg” MMC “Mətanət-A” şirkətinin strukturuna daxildir.