Hövsan Yaşayış Kompleksində ümumilikdə 503 mənzilin həm ipoteka kreditindən istifadə etməklə, həm də öz vəsaiti hesabına ödəniş üsulu ilə satışı prosesi uğurla başa çatıb.

Mənzil İnşaatı Dövlət Agentliyindən Valyuta.az-a bildirilib ki, satış prosesinə bu gün saat 11:00-da başlanılıb və qısa müddətdə başa çatıb. 

Bugünkü satış zamanı 503 mənzilin seçimində iştirak edənlərin sayı 1472 nəfər olub. 

Son məlumata görə, seçilmiş 503 mənzil üzrə 404 vətəndaşın ərizələri uğurla imzalanaraq təqdim edilib.  

Kompleksin 1 saylı binası üzrə 4 mənzil, 2 saylı binası üzrə 22 mənzil, 3 saylı binası üzrə 52 mənzil, 4 saylı binası üzrə 23 mənzil, 6 saylı binası üzrə 159 mənzil və 7 saylı binası üzrə 243 mənzil olmaqla 503 mənzil satışa çıxarılıb.

Qeyd edək ki, mənzilləri vətəndaşların güzəştlə əldə etməsi qaydasına uyğun olaraq, gözləmə qaydasında mənzillərin seçimi 26 aprel tarixində saat 11:00-da başlayacaq və 30 aprel tarixi saat 11:00-dək davam edəcək.