“Çin alternativ enerji mənbələri üzrə hazırlanan texnologiyalar sahəsində kifayət qədər inkişaf edib. Belə davam edərsə, gələcəkdə iqlim dəyişikliyi ilə mübarizədə istehsal olunacaq texnika sahəsində Çin böyük pay sahibi olacaq”.

Valyuta.Az Blomberg.com-a istinadən xəbər verir ki, bu açıqlama ilə ABŞ-ın xarici işlər naziri Antoni Blinken çıxış edib. 

Nazir yerli mətbuata verdiyi açıqlamasında qeyd edib ki, 2040-cı ilə qədər qlobal istiləşmə ilə mübarizə üçün yaradılması vacib olan struktur və texnikanın ümumi həcmi 4,6 trilyon dollar təşkil edəcək. 

Onun sözlərinə görə, bütün bunlar ABŞ şirkətləri üçün güclü maliyyə mənbəyi ola bilər:

“Dünyada alternativ enerji mənbələri sahəsi üzrə ümumi dövriyyənin 2025-ci ildə 2,15 trilyon dollar olması gözlənilir. Bu göstərici ABŞ-ın hazırki alternativ enerji mənbələri üzrə olan maliyyəsinin 35 qatı deməkdir. Lakin, nəzərə almaq lazımdır ki, Çin hazırda bu sahədə bizdən öndədir və tez bir zamanda bunun qarşısı alınmazsa, gələcəkdə qlobal iqlim fəaliyyəti ilə bağlı bütün planlar və layihələr məhz Çin dövləti və yerli şirkətləri tərəfindən həyata keçirilə bilər”. 

Tərcümə edən: Kamran Xəlilov