Yerüstü Nəqliyyat Agentliyi İdarə Heyətinin sədri Anar Rzayev bildirib ki, bir il ərzində Bakı şəhərində təxminən 2 milyard səfər həyata keçirilir. Bunun 52 faizi fərdi avtomobillərin və taksilərin payına düşür. Ümumiyyətlə, Bakıda əhalinin fərdi avtomobillərdən çox istifadə etməsinin səbəbi nədir? Fərdi avtomobillərdən çox istifadə olunması tıxac probleminin əsasıdırmı?

Bu barədə Valyuta.az-a danşan nəqliyyat məsələləri üzrə ekspert Eldəniz Cəfərov bildirib ki, dünyanın müxtəlif şəhərlərində bu rəqəmlər fərqlidir. Bu, ictimai nəqliyyatın inkişaf dərəcəsindən asılıdır:

“Hansı şəhərlərdə ictimai nəqliyyat daha yaxşı inkişaf edibsə, orada fərdi nəqliyyat vasitələrindən və taksilərdən az istifadə olunur. Bakıda vaxtilə mövcud olmuş ictimai nəqliyyat infrastrukturu nədənsə darmadağın edilib, tramvay və trolleybus xətləri bir ay ərzində sökülüb. Hazırda ictimai nəqliyyatın marşrut xətlərindən və metrodan ibarət olması sərnişin daşımada müəyyən çətinliklər yaradır. Hazırda fəaliyyət göstərən öz-özünə formalaşan taksi sisteminin olması çox müsbət haldır”.

Ekspert yollarda olan tıxacların səbəblərinin çox olduğunu vurğulayıb:

“Yollarda tıxacların yaranma səbəbləri sadəcə avtomobillərin çoxluğu ilə əlaqəli deyil. Əsas problem yolların yoxluğudur. Bakı şəhərində və ətraflarda yol infrastrukturu yaxşı qurulmayıb. Bunu ötən illər ərzində təhlil də etmişik. Küçələrin yol infrastruktunun düzgün olmaması, butulka effektinin yaranması və bəzi sürücülərin məsuliyyətsizliyi də tıxacların çoxluğuna gətirib çıxarır.

Bakı şəhərinin əhalisinin sayının çox olması, sənaye şəhərinin olması, zəngin mədəni həyatın olması – yəni, hər gün Bakının mərkəzində müəyyən tədbirlər keçirilməsi də tıxac yaradan faktorlardandır. Birmənalı olaraq deyə bilmərik ki, tıxacların əsas səbəbi avtomobil çoxluğudur. Amma yenə də ictimai nəqliyyat nə qədər inkişaf etdikcə fərdi avtomobillərdən istifadə azalacaq”. 

Əvəz Həsənov