“Bakının bir çox yollarında piyadalar üçün olan yerüstü keçid xətlərinin bir hissəsi pozulub, aydın görünmür”. 

Bu vəziyyət isə həm sürücülər, həm də piyadalar arasında çaşqınlıq yaradır. Xüsusi ilə havanın qarlı, yağışlı dövrlərində gediş-gəlişi çətinləşdirir. Bəs bu yoldan keçid zamanı üstünlük kimlərin olmalıdır? Pozulmuş, seçilməsi az mümkün olan keçidlərin üstündə qəza baş verərsə, sürücü məsuliyyət daşıyırmı?

Valyuta.az bu sualları nəqliyyat məsələləri üzrə ekspert Aslan Əsədovla müzakirə edib. 

Aslan Əsədov bildirib ki,  həmin ərazidə piyada keçidi olması ilə bağlı nişan varsa, burda üstünlük piyadalardadır:

“Xətlər pozulubsa da, sürücü piyadanı gözləmədən keçə bilməz. Qanun buna icazə vermir. Azərbaycan Respublikasında yol hərəkəti ilə bağlı tətbiq edilən cərimələr nişanın tələbinin pozulması ilə bağlı qəbul olunur.  Yəni, bu cərimələr nişan tiplərinə, nişanlara uyğun müəyyənləşdirilir. Bunlara isə həm üfiqi, həm də şaquli nişanlar daxildir. Hər hansı nişanın tələbi pozulursa, cərimələr yazılır. 

Yerdə şaquli nişan varsa, mütləq onun asfaltda da cizgisi, boyası olmalıdır. Bu isə əlaqədar qurumun məsul şəxslərinin cavab verəcəyi məsələdir”. 

"Bu nişanlara hansı qurum cavabdehdir” sualına cavab olaraq ekspert bildirib  ki, bu yollar ərazidən asılı olaraq qurumların balansına verilib:

“Bakı şəhərində olan yollarda bu nişanlara əvvəl Bakı Nəqliyyat Agentliyi indi isə AYNA nəzarət edir. Magistral yol, yol qıraqlarıdırsa, buna AYDA cavabdehdir. Digər şəhərlərdə - Sumqayıt, Gəncə, Xırdalanda isə bunlara həmin şəhərlərin İcra Hakimiyyəti nəzarət edir. Onların göstərişi, tələbi ilə Dövlət Yol Polisinin təqdimatı əsasında bu nişanlar qoyulur, piyada keçidləri cizgilənir”. 

“Xətlərinin pozulduğu piyada keçidlərinin üzərində qəza hadisəsi baş veribsə də burda birmənalı olaraq sürücülər günahkar hesab olunur. Çünki sürücülər şəhər içi sürətlərinə də nəzarət etməlidir. Bu yollarda 50-60 km/saatla getmək lazımdır”, ekspert əlavə edib. 

Davud