“Əfsus ki, sovet dövründən qalan bu yolu indiki durumda genişləndirmək şəhərin daxilində çox mürəkkəbdi. Digər alternativlərdən istifadə etmək lazımdır. Amma su nəqliyyatının yaradılmasını yeni baş plana əlavə etsəydilər, bu, daha yaxşı olardı və tıxacın qarşısını qismən də alardı.” 

Bunu Valyuta.az-a nəqliyyat məsələləri üzrə ekspert Rövşən Həsənov Bakının yeni hazırlanmış baş planına tıxac və sıxlığın qarşısını almaq üçün su nəqliyyatı ilə bağlı layihənin əlavə edilməməsi haqqında danışarkən deyib.

Rövşən Həsənov bildirib ki, baş planın açıqlanması təqdirə layiq və ürəkaçıcı bir məqamdır. Amma əfsuslar olsun ki, bura dəniz nəqliyyatı ilə bağlı heç nə salınmayıb:

“Məsələn, dənizkənarı bulvardan Əhmədli istiqamətində, Zığ istiqamətində  dəniz nəqliyyatını baş plana əsasən işə salsa idilər, burda liman yaradıb dəniz yolu ilə daşıma həyata keçirsəydilər yaxşı olardı.  Sadəcə bu nəqliyyatın səmərəliliyini yəni, sərfiyyatı, gedişhaqqını hesablamaq lazımdır. Amma bu nəqliyyat qismən də olsa sıxlıq və tıxacın qarşısını alardı”. 

Hazırda Bakının yollarındakı hər gün ağırlaşan vəziyyət haqqında da danışan ekspert bildirib ki, ümumi sıxlıq və tıxacın qarşısının alınması, geniş miqyaslı məsələdi:

“Yəni sırf sərnişindaşımanı artırmaq, zolaqların sayını artırmaq həll deyil. Bunu həyata keçirtmək üçün tikinti normativlərinə uyğun olaraq zolaqlar artırılmalıdır, yollar genişləndirlməlidir. İndi küçələrdə salınan velosiped zolaqlarını yolun daxilində yox, indiki yolun kənarında genişləndirərək əlavə etmək lazım idi. Məsələn, yolda iki zolaq varsa, onun da birinin yarısında velosiped zolağı yaradılır. Bu da yolun daralmasına səbəb olur. Onsuz da bu iki zolaq üzərindən yolun pik saatında hərəkət intensiv olduqda sıxlıq və tıxacı biz yaşayırıq. Belə olan halda velosiped zolağını bu yola daxil etməkdə məqsəd nədir? Bu çıxış yolu deyil. Sıxlıq və tıxacın qarşısını almaq üçün bir çox planlar işlənməlidir. Bir planlar üzərindən iş getməz”. 

Qeyd edək ki, Nazirlər Kabineti "Bakı şəhərinin 2040-cı ilədək inkişafına dair Baş planı”nı təsdiq edib.

Bununla bağlı Baş nazir Əli Əsədov yeni qərar imzalayıb.

Qərar Şəhərsalma və Tikinti Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında 29 iyun 2012-ci il tarixli qanunun tətbiqi barədə ölkə Prezidentinin 4 sentyabr 2012-ci il tarixli fərmanına əsasən, Dövlət Şəhərsalma və Arxitektura Komitəsinin təklifi nəzərə alınaraq qəbul edilib.

Davud