“Bakı Metropoliteni” tenderdə qanunsuzluğa yol verib? - Nazirlik müsabiqəni ləğv etdi
“Bakı Metropoliteni” Qapalı Səhmdar Cəmiyyətinin (QSC) müxtəlif növ mebel və mebel aksesuarlarının satın alınması ilə bağlı elan etdiyi tender ləğv olunub.
Valyuta.az xəbər verir ki, tenderin ləğv olunmasının səbəbi kimi “Dövlət satınalmaları haqqında” Qanunun 4.1.2, 38.2 və 57.3.7-ci maddələri göstərilib.
4.1.2-ci maddədə bildirlir ki, dövlət satınalmaları üzrə müvafiq icra hakimiyyəti orqanı dövlət vəsaiti hesabına malların (işlərin və xidmətlərin) müsabiqə əsasında satın alınmasının qanuniliyinə və müqavilələrin icrasına nəzarət edir, mübahisəli məsələləri araşdırır, qanunvericiliyin pozulması hallarını aşkar etdikdə, satınalma prosedurlarını 7 bank gününədək dayandırır və lazım gəldikdə satınalan təşkilat qarşısında tenderin nəticələrinin ləğv edilməsi barədə məsələ qaldırır.
38.2-ci maddədə isə qeyd edilir ki, tender komissiyası bu Qanunla müəyyənləşdirilmiş vəzifələrini yerinə yetirərkən qeyri-obyektivliyə yol verərək, hər hansı iddiaçının tərəfini saxlayarsa, iddiaçılardan hər biri müvafiq icra hakimiyyəti orqanına və ya məhkəməyə müraciət edə bilər.
Həmin orqanlar tenderin hazırlanması və keçirilməsi zamanı qanun pozuntusuna yol verildiyini təsdiqləyərsə, tenderin nəticələri ləğv olunur və satınalan təşkilat həmin iş üzrə yeni tender keçirir. Bu halda qəbul olunmuş qərardan fərqlənən xüsusi rəy vermiş komissiya üzvlərindən başqa, komissiyanın sədri və digər üzvləri 3 il müddətində hər hansı tender komissiyasının sədri və ya üzvü ola bilməzlər.
57.3-cü maddədə isə satınalma prosedurlarına xitam verilməsi barədə sərəncam vermək nəzərdə tutulur.
Bu maddələrin şərh edərkən aydın olur ki, “Bakı Metropoliten” QSC-nin keçirdiyi satınalma müsabiqəsində qanun pozuntularına yol verilib. İddiaçılardan biri bu barədə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə inzibiati qaydada şikayət edib.
Bu qurum isə “Dövlət satınalmalar haqqında” Qanunun 4.1.2 və 57.3.7-ci maddəyə istinad edərək tenderi ləğv edib.
“Bakı Metropoliteni” QSC-nin sədri Zaur Hüseynovdur. O, 2014-cü ildən bu vəzifədədir.
Hüseyn
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay