“İstər Bakı daxilində, istərsə rayonlararası və şəhərlərarası qanunsuz sərnişindaşımalara son qoyulmalıdır”.

Valyuta.az xəbər verir ki, bu barədə Modern.az-a danışan Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov problemin daha çox dövlət büdcəsinə ziyan vurduğuna diqqət çəkib:

“Bəziləri VÖEN əsasında çalışsa da, böyük qisminin heç bir sənədi yoxdur və onlar qanunsuz fəaliyyət göstərirlər. Bunun qarşısını isə Nəqliyyat, Rabitə və Yüksək Texnologiyalar Nazirliyi almalıdır. Çünki nazirliyin nəzarətlə bağlı tabeli qurumları, şöbələri var. Ümumiyyətlə haradasa maşını saxlmaq qeyri-mümkündür, o dəqiqə cərimə yazırlar, amma qeyri-qanuni daşımların qarşısını ala bilmirlər?

Bəzən fikirlər səsləndirilir ki, məsələ Daxili İşlər Nazirliyilə birgə həll edilməlidir. Amma məncə bunu heç DİN səviyyəsinə qaldırmağa da ehtiyac yoxdur. Avtovağzalların qarşısındakı qanunsuz daşımaları göstərmək üçün əlavə quruma ehtiyac yoxdur axı, onlar çox qəşəng bilirlər yerlərini. Avtovağzalın böyrü-başı qanunsuz daşımalarla doludur. Onların özlərinin kameraları var, hər şeyi izləyirlər”.

Deputat problemə rəvac verən hallardan biri kimi işsizliyi əsas göstərib:

“Mən heç bir halda qanunsuzluğa haqq qazandırmıram. Amma normal iş yerləri, şərait olsaydı, o insanlar da həm özlərinin, həm də digərlərinin həyatını riskə ataraq, bu yolla pul qazanmağı seçməzdilər. Çünki bir çox hallarda baş verən qəzalar zamanı məhz nəqliyyat vasitəsinin qanunsuz daşıma ilə məşğul olduğu meydana çıxır. İnsan həyatı ilə bu cür oynamaq olmaz”.
 
Parlamentari son vaxtlar nəqliyyatla bağlı çox sayda suallar yarandığını bildirib:

“Ümid edək ki, yeni gələn nazir bunların həllinə çalışacaq. Qanunsuz sərnişindaşımaların qarşısı mütləq şəkildə alınmalıdır ki, dövlət büdcəsinə daxilolmalar artsın, vergidənyayınma halları aradan qalxsın”.