Azərbaycanla İsrail arasında turizm, kənd təsərrüfatı, xüsusən də aqrotexnologiya sahələrində qarşılıqlı faydalı əlaqələrin genişlənməsi üçün hər cür şərait mövcuddur.

Valyuta.az xəbər verir ki, bunu Bakıda "Israel Hayom” nəşrinə verdiyi müsahibədə nazir Mikayıl Cabbarov söyləyib.

“Bizim İsrail ilə kiber müdafiə, informasiya texnologiyaları, investisiya, təhsil, su ehtiyatları və səhiyyə sahələrində də səmərəli əməkdaşlığımız var” – deyən nazir qeyd edib ki, artıq Bakı İsraildə Azərbaycanın turizm bürosunun yaradılması barədə rəsmi qərar verib, həmçinin ticarət bürosunun yaradılması üzərində iş gedir:

“Biz qısa müddətdə iqtisadi əlaqələrin inkişafına, dövlət və özəl biznes dialoqunun təşviqinə müsbət təsir göstərən Azərbaycan-İsrail Ticarət və Sənaye Palatasının yenidən canlandırılmasında da maraqlıyıq.

Biz İsrailin uğurlu peyvənd kampaniyası təcrübəsindən Azərbaycanda da istifadə oluna biləcəyinə əminik. Bu gün peyvənd olunan vətəndaşlarının sayı 15 faizi keçən və peyvəndə əlçatanlığın təmin olunduğu ölkəmiz, vaksinasiya tempinə görə region ölkələri arasında liderdir”.

Nazir vurğulayıb ki, texnologiya sahəsi də İsrail ilə əməkdaşlığı daha da yaxşılaşdırmaqda maraqlı olduğumuz sferalardan biridir.