Dünyanın ən böyük aktiv idarəetmə şirkəti olan "BlackRock"un aktivləri keçən ilin IV rübündə rekord 11,6 trilyon dollara çatıb.

Valyuta.Az "Reuters"ə istinadən xəbər verir ki, şirkətin mənfəəti 21% artıb ki, bu da güclü səhmlər bazarının yaratdığı xidmət haqları ilə əlaqəlidir.

Nyu-Yorkda yerləşən şirkətin idarə etdiyi aktivlərin həcmi əvvəlki ilin eyni dövründəki 10,01 trilyon dollardan və III rübdəki 11,48 trilyon dollardan artaraq 11,55 trilyon dollara çatıb.

Xalis gəlir dekabrın 31-də başa çatan üç ay ərzində 1,38 milyard dollardan (bir səhm üçün 9,15 dollar) 1,67 milyard dollara (bir səhm üçün 10,63 dollar) yüksəlib.

Müştəri aktivlərinin artımı ABŞ-də səhmlər bazarının Donald Trampın noyabr ayında keçirilən prezident seçkisindəki qələbəsindən sonra yaşanan yüksəliş fonunda baş verib. İnvestorlar aşağı korporativ vergilər və tənzimləmələrin azaldılacağı gözləntiləri ilə bazara giriş ediblər.

Qeyd edək ki, şirkət sürətlə böyüyən özəl bazarlardakı mövqeyini gücləndirmək məqsədilə 2024-cü ildə "Global Infrastructure Partners" infrastruktur investisiya fonuna və "HPS Investment Partners" özəl kredit biznesinə təxminən 25 milyard dollar sərmayə yatırıb.

Rəhim