Azərbaycan və Birləşmiş Ərəb Əmirliklərinin "Masdar" şirkəti arasında dörd sənəd imzalanıb.

Vayuta.az xəbər verir ki, imzalanan sənədlər arasında "Dənizdə inteqrasiya edilmiş bərpa olunan enerji sahəsində əməkdaşlığa dair Anlaşma Memorandumu", "Bərpa olunan enerji və enerji səmərəliliyi sahəsində Anlaşma Memorandumu", "Bərk məişət tullantılarından enerji istehsalı sahəsində Anlaşma Memorandumu" və "Qarabağ və Şərqi Zəngəzur iqtisadi rayonlarında bərpa olunan və təmiz enerji sahəsində əməkdaşlığa dair Anlaşma Memorandumu" yer alıb.

Xatırladaq ki, bu gün "Masdar" şirkəti tərəfindən Azərbaycanda inşa ediləcək 230 MVt gücündə Qaradağ Günəş Elektrik Stansiyasının təməlqoyma mərasimi keçirilib.

Qeyd edək ki, ötən ilin aprel ayında Azərbaycan Energetika Nazirliyi və "Azərenerji" ASC ilə "Masdar" şirkəti arasında 230 MVt gücündə günəş elektrik stansiyası layihəsi üzrə "İnvestisiya müqaviləsi", "Enerji alqı-satqı müqaviləsi" və "Ötürücü şəbəkəyə qoşulma müqaviləsi" imzalanıb. 2020-ci ilin sonunda isə Energetika Nazirliyi və "Azərenerji" ASC ilə "ACWA Power" şirkəti (Səudiyyə Ərəbistanı) arasında qoyuluş gücü 240 MVt olan külək elektrik stansiyası layihəsi üzrə müvafiq müqavilələr imzalanıb.