Daşınmaz əmlak Azərbaycanda ən çox investisiya qoyulan sahələrdəndir. Hətta böyük məbləğlərini bu sahəyə yatıranlar da çoxdur. Bu şəxslər nə vaxtsa, uduza bilərmi? Bakıda daşınmaz əmlak qiymətləri o qədər ucuzlaşa bilərmi ki, həmin şəxslər gələcəkdə peşman olsunlar?

Əmlak məsələləri üzrə ekspert Elnur Azadov Valyuta.az-a açıqlamasında bildirdi ki, əslində, daşınmaz əmlak iqtisadiyyatın bütün göstəricilərinə mütənasibdir, onun qiyməti dəyişir: “Təcrübə də bunu göstərir. Son 25-30 ilə yaxındır ki, bizim ölkədə daşınmaz əmlakın dəyəri dayanmadan, ilbəil artmaqdadır. İstisna hal 2-3 dəfə iqtisadi böhranlar olan vaxt olub. Onun dəyəri həmin zaman dayanıb, az da olsa düşüb. Son 25-30 il ərzində bu, cəmi 2 dəfə olub. Bu baxımdan, daşınmaz əmlaka yatırılan investisiya özünü doğruldur. Hətta son 3,5 il ərzində daşınmaz əmlakın orta hesabla qiymətinin 40 %-ə yaxın bahalaşığını nəzərə alsaq, bu, o deməkdir ki, ən azı son illər ərzində daşınmaz əmlakın 10 %-dən az olmayaraq qiyməti ilbəil artmaqdadır”. 

Ekspert qeyd edib ki, daşınmaz əmlak sektorunda bahalaşma daha çox 2022-ci və 2023-cü illərdə olub. 2024-cü ildə bahalaşma çox da qeydiyyata alınmayıb.

Maya Hüseynova