Cari ilin iyun ayının 1-nə qədər Azərbaycanda bütün əmlak üzrə toplanan sığorta haqları ötən ilin eyni dövrü ilə müqayisədə 3 milyon 188,6 milyon manat və ya 3,99 faiz azalıb. Mərkəzi Bankın rüblük statistikasında göstərilir ki, cari ildə bu məbləğ 76 milyon 769.6 min manat, ötən il isə 79 milyon 958.2 min manat təşkil edib.  

İqtisadçı ekspert Pərviz Heydərov Valyuta.az-a açıqlamasında bildirib ki, bütün əmlak üzrə sığorta haqları həcminin azalmasının səbəbi həmin sahə üzrə qanunvericilikdə olan müddəalarla bağlı mübahisələrdən qaynaqlanır: 

“Sığorta icbari və könüllü olmaqla iki yerə bölünür. Sığorta haqlarının icbari hissəsi məcburi şəkildə icra olunmalıdır. Amma ölkəmizdə digər sahələrdən fərqli olaraq, bilavasitə əmlak sahəsində sığorta mexanizminə dair qanunvericilikdə müəyyən anlaşılmazlıq və ziddiyyətlər var. Bu da vətəndaşlarla müvafiq sığorta şirkətləri arasında mübahisələrə gətirib çıxardır. 

Cari il ərzində əmlak sığortası üzrə yığılan vəsaitin azalması bu mənada gözlənilən idi. Nə qədər ki, bu sahə üzrə qanunvericilikdə dəqiqləşdirilmə aparılmayıb, sığorta sahəsində toplanan vəsaitlərin getdikcə azalmaqda davam edəcəyini müşahidə edəcəyik. Qanunvericilikdə əmlak üzrə sığorta haqlarının yığılması mexanizmi və prosedurunun hansı çərçivə və hansı qanunlar əsasında həyata keçirilməli olduğu dəqiq müəyyən edilməlidir ki, vətəndaş və sığorta şirkəti öz məsuliyyətlərini dəqiqliklə ayırd edə bilsinlər”.  

Ramiz