Ukraynanın öz ərazisindən keçən Rusiya qazı tranzitindən imtinası Avropa İttifaqı ("Aİ") ölkələrinə 100 milyard avroya başa gələ bilər. 

Valyuta.Az xəbər verir ki, bu qiymətləndirməni "Metlen Energy & Metals" sənaye və enerji şirkətinin baş direktoru Evangelos Mitilineos (Evangelos Mytilineos) Yunanıstanın "Ikonomikos Tahidromos" portalına verdiyi müsahibədə bildirib.

"Biz bazarda təbii qaz idxalının beş faizini itiririk və bu, artıq gərgin vəziyyətdə olan bir bazardır. [Niderland qaz mərkəzi] "TTF"də qiymətlərin 1 meqavat-saat üçün 30 avrodan 50 avroya qalxmasının şahidi olduq. Bu 20 avroluq fərq təkcə Ukrayna vasitəsilə idxala deyil, ümumilikdə bütün idxala təsir edir, çünki tədarük müqavilələri "TTF"dəki qiymətə bağlıdır", – ekspert hesablamalarını bölüşüb.

Mitilineos əlavə edib ki, Avropa ildə 500 milyard kubmetr təbii qaz idxal edir. Qiymət artımı 20 avro olduqda isə bu, 100 milyard avro itki deməkdir.

Bundan əvvəl Macarıstanın xarici işlər naziri Peter Siyarto (Péter Szijjártó) bildirmişdi ki, Ukrayna üzərindən Rusiya qazının tranzitinin dayandırılması nəticəsində Avropada yanacaq qiymətləri 20 faiz artıb. Onun fikrincə, bunun səbəbi müəyyən nəqliyyat marşrutlarının bağlanması ilə təbii qaz həcmlərinin "süni şəkildə azaldılmasıdır".

Rəhim